Shenjtorët e Javës së ardhshme sipas Kalendarit kishtar
(17.08.2008 RV)Sot Kisha katolike
kremtoi të Dielën XX të kohës së zakonshme gjatë vitit kishtar. U përkujtua edhe
Shën Euzebi, papë e martir e Shën Kjara nga Montefalko, abateshë agostiniane.
Të
bësh mirë do të thotë të zbatosh urdhërimet e Tënzot. Po Jezusi kërkon nga ne shumë
më tepër: a jemi të gatshëm për ta dëgjuar? Këtë na kujton liturgjia të hënën,
në festën e Shenjtorëve Flori e Lauri, martirë të Ulpianës në Kosovë, Agapito, martir
dhe Elena, perandoreshë.
Në festën e Shën Gjonit Eudes,
themelues i Eudistëve, Shën Sistit III papë e Shën Manjit, martir, të martën e
ardhshme, ftohemi të vijojmë reflektimin mbi thirrjet që na bën Jezusi. Zoti është
aq kërkues, sa i tremb edhe vetë nxënësit e tij. Në qoftë se duam të ndërtojmë me
Të një botë të re, duhet ta ndjekim pas me besim e guxim.
Të mërkurën
do të kremtohen Shën Bernardi, abat e dijetar i Kishës, Shën Samueli profet e Shën
Maria Matias, virgjër, themeluese e Motrave Adhuruese të Gjakut të Krishtit. Na kujtojnë
se puna për mbretërinë e Hyjit nuk numërohet me orë. I Zoti i vreshtës na bën thirrje
çdo ças e pret t’ia kushtojmë vetveten, pa pyetur për kohë as për djersë, të sigurtë
se nuk do të na mungojë shpërblimi i drejtë.
Në liturgjinë e së enjtes,
në festën e Shën Piut X, papë, Ungjilli na rikujton shembëlltyrën e gostisë, në të
cilën nuk mund të hysh, pa veshje të përshtatshme. Veshja që kemi marrë në Pagëzim,
është ftesë për të hyrë në festë, por edhe ftesë për të rifilluar rrugën e gjatë të
formimit të vazhdueshëm në fe.
Të premten, në festën e Virgjërës Mari,
Mbretëreshë, të Shën Timoteut, martir romak e Shën Filip Benicit, meshtar, na rikujtohet
rregulla e artë e Jezusit. Pyetja që i drejtojnë saduçejtë, e nxit Zotin t’i përmbledhë
gjithë Ligjin e Profetët në fjalët: “Duaje Zotin Hy e duaje edhe të afërmin”.
Shën
Roza nga Lima (emër që në shqip ka marrë trajtat Drande e Ganxhe) virgjër terciare
dominicane dhe Shenjtorët Abondi, Ireneu, Qiriaku e Arkelau, martirë, që do të festohen
të shtunën, na kujtojnë se për të jetuar si i krishterë i vërtetë, duhet të
jesh i përvujtë, i patundur në fenë, të cilën e beson dhe e jeton e i lidhur me vëllezërit,
sepse bij të të njëjtit Atë.
Të dielën e ardhshme Kisha do të vijojë
liturgjinë e Kohës së zakonshme gjatë vitit kishtar, duke kremtuar të dielën XXI të
kësaj kohe.