Në festën e të Ngjiturit të Zojës në Qiell nisi misioni kontinetal në Amerikën Latine e në Karaibe.

(15.08.2008 RV)Festë e madhe sot në të 22 shenjtëroret kombëtare të Amerikës Latine e të Karaibeve, por edhe në dhjetra e dhjetra shenjtërore të tjera, pothuajse në të gjitha qytetet e rëndësishme të zonës. Solemniteti i të Ngjiturit të Zojës në Qiell është një çast i posaçëm, në të cilin përkojnë të gjitha kremtimet fetare në mbarë zonën: nga Meksika, në Kili; nga Paqësori, në Atlantik; në metropolet e mëdha, por edhe në qendrat më të vogla urbane; në qyteza e fshatra, në fushë e në mal. Lidhjen e ngushtë me këtë festë, së bashku me festën e Zojës së Papërlyer, më 8 dhjetor, devocioni marian latinoamerikan, i rrënjosur thellë që nga koha e ardhjes së spanjollëve e portugezëve, e shpreh me forcë përmes procesionesh ‘romerias’, kremtimit të Rruzares Shenjte e të Eukaristisë, për të nderuar, kështu, Virgjërën Shenjte të përgjumur e të ngjitur në qiell me trup e shpirt. Gjithnjë më e ndjerë vitet e fundit edhe tradita për ta dëgjuar, përmes valëve të radios, lutjen e Engjëllit të Tënzot të Papës, që shpesh arrin deri në skajet më të harruara të kontinentit.
Prandaj sot, në Kuito, dita e pestë dhe e fundit e Kongresit Amerikan Misionar, përfundoi me fillimin e “Misionit të madh kontinental”, vendosur në përfundim të Konferencës së Episkopateve të Amerikës Latine e të Karaibeve, në Aparesida.