(15.08.2008 RV)Në të katër anët
e botës, misionarët e Kishës katolike, priftërinj, rregulltarë e laikë, përpiqen me
të gjitha forcat që të gjithë njerëzit ta njohin Krishtin, të besojnë në Të. Po jo
gjithnjë ia dalin mbanesh. Ç’duhet bërë që njeriu të thotë me gjithë zemër: ‘Tani,
po, besoj?’. Kësaj pyetjeje i përgjigjet e Lumja e parë shqiptare në emisionin tonë
të trembëdhjetë të ciklit radiofonik “Me Nënë Terezën”, që bazohet tek libri
‘Jeta ime’.
“Problemi i urisë është rrënqethës, por nuk mund të
zgjidhet duke e analizuar teorikisht. Duhet vepruar, duke nisur nga njeriu
i parë, që takojmë. Në se e bëjmë të lumtur e të qetë një njeri të vetëm,
kemi bërë diçka, që menjëherë do të na e shpërblejë mundimin, duke na bërë edhe ne
të lumtur. Një ditë gjetëm në rrugët e Kalkutës një burrë, që po vdiste
nga uria. E sollëm në shtëpinë tonë. Nuk ishte më në gjendje të
hante, sepse kishte kaluar ditë e ditë pa vënë gjë në gojë. Të nesërmen
u munduam t’i japim pak oriz. Por pikërisht kur po përpiqej të hapte gojën
për ta ngrënë, dha shpirt: kishte ndenjur tepër gjatë pa ushqim. Nuk mund të rikthehej
më në jetë. Të krishterët e parë vdisnin për Jezusin e njiheshin për dashurinë
që kishin njëri për tjetrin. Kishte shumë dashuri ndërmjet të krishterëve asokohe. Kurse
sot bota ka tepër nevojë për dashuri. S’ka pasur kurrë më shumë. Njerëzia
vdesin nga uria për dashuri. Gjatë shtegtimeve të mia nëpër rrugët e kësaj
bote, kam parë me sytë e mi prindër që i japin për të ngrënë vetëm fëmijës më të
madh në moshë, që të mund të shkojë në shkollë. Të tjerët duhet të rrinë
shtrirë, gjysëm të vdekur, që të mos kërkojnë bukë më shumë se një herë në ditë. Besoj
se jo të gjithë e kuptojnë sa e tmerrshme është kjo. Veç në se do ta provonin në fëmijët
tyre. Një ditë pas vdekjes së njeriut të uritur, motrat e mia po pastronin
një të gërbulur, të mbuluar me plagë. Një hoxhë i ndoqi me vëmendje, deri
sa e kryen punën dhe e vendosën të gërbulurin në shtroje. Hoxha, i mrekulluar,
tha: “Kam besuar gjithnjë se Krishti është profet. Sot, po, besoj se Jezu
Krishti është Zot, ndryshe si mund t’u jepte gjithë këtë gëzim këtyre motrave: gëzim
pa të cilin nuk do të ishin kurrë në gjendje ta kryenin një punë të tillë”.