Agjensia Forum 18 denoncon mungesën e lirisë fetare në Turkmenistan
(12.08.2008 RV)Agjensia Forum 18 shpreh shqetësimin për mungesën e lirisë fetare
në Turkmenistan. Megjithëse Kushtetuta ia njeh të gjithë nënshtetasve të drejtën për
të zgjedhur fenë që dëshirojnë - pohon Agjensia AziaNjuz – besimtarët nuk lejohen
as të mblidhen për t’u lutur, pa autorizimin përkatës nga organet shtetërore, leje
që jepet me shumë vështirësi. Por edhe kur jepet, në vendet e takimit ndërhyn policia,
e cila u vë besimtarëve gjoba të rënda, me motivacionin “për veprimtari fetare ilegale’.
Për Kishën katolike, i vetmi vend i njohur nga shteti, është nunciatura e Selisë së
Shenjtë në Ashgbat, ku mund të kremtohet mesha, pa frikën e shtetëzimeve e të gjobave.
Në të njëjtën mënyrë trajtohen edhe besimtarët e feve të tjera: myslimanët, ortodoksët
e protestantët e, sidomos, liderët e tyre. Mësimi i çdo lloj feje është i ndaluar
edhe brenda bashkësisë; e ndaluar - edhe letërsia fetare. Ku gjindet, sekuestrohet
nga policia e fshehtë. Të gjitha fetë janë vënë plotësisht nën kontrollin e shtetit.