Papa në Engjëllin e Tënzot për krizën ndërmjet Rusisë e Gjeorgjisë: t’i jepet fund
veprimeve ushtarake, në emër të trashëgimisë së përbashkët të krishterë.
(11.08.2008 RV)Thirrje e fuqishme
për situatën në Osetinë jugore, shoqëruar nga ftesa për t’u lutur së bashku me ortodoksët,
ishin në qendër të vëmendjes në lutjen e djeshme të Engjëllit të Tënzot, kremtuar
nga Benedikti XVI, gjatë së cilës Papa shprehu edhe mirënjohjen për periudhën e pushimit
e të meditimit në Alto Adigje. Pas lutjes mariane, Benedikti XVI shprehu ankthin
e thellë për ngjarjet tragjike, që vijojnë në Gjeorgji e që, duke nisur nga zona e
Osetisë jugore, shkaktuan shumë viktima të pafajshme e i detyruan shumë civilë të
largohen nga shtëpitë e tyre. “Uroj me gjithë zemër – tha Papa – të
marrin fund menjeherë veprimet ushtarake e të hiqet dorë, edhe në emër të trashëgimisë
së përbashkët të krishterë, nga ndeshjet e raprezaljet e dhunshme, që mund të degjenerojnë
në një konflikt me shtrirje akoma më të gjërë; e të rifillojë rruga e bisedimeve dhe
e dialogut respektues e ndërtimtar, duke i shpëtuar kështu këto popullsi të dashura,
nga vuajtje të reja e të dhimbshme”. Më pas Ati i Shenjtë i bëri thirrje edhe
Bashkësisë Ndërkombëtare: “Ftoj edhe Bashkësinë Ndërkombëtare dhe vendet që
kanë më shumë ndikim mbi situatën aktuale, të bëjnë çdo përpjekje të mundshme, të
mbështesin e të promovojnë nisma për të gjetur rrugëzgjidhje paqësore e afatgjata,
në favor të bashkëjetesës mbi bazën e respektit të anasjelltë”. Papa i ftoi
besimtarët të luten, së bashku me vëllezërit ortodoksë, duke ia besuar ndjetin e vet
Virgjërës Mari. Në përfundim, duke folur në gjuhën gjermane e në atë ladine, i falënderoi
të gjitha bashkësitë famullitare të Bolxano-Bresanones për përzemërsinë e tyre, duke
përfshirë këtu edhe gazetarët e punonjësit e informacionit masiv, që e ndoqën gjatë
periudhës së pushimeve.