Vdiq Aleksandër Sollzhenicin, përfaqësuesi më i shquar i disidencës sovjetike.
(04.08.2008 RV)Zi në botën e kulturës.
Shkrimtari Rus, Aleksandër Sollzhenicin, lindur në vitin 1918, Nobel për Letërsinë
më 1970, vdiq gjatë natës në shtëpinë e tij në Moskë. Ishte 89 vjeç. Figurë e madhe
e disidencës sovjetike, që guxoi t’i kundërvihej Stalinit gjaktar, shkroi veprat kryesore
kushtuar kampeve të përqendrimit, ndërmjet të cilave, kryevepra “Arkipelagu Gulag”,
trilogji, gjysëm autobiografike e gjysëm historike, përkthyer jashtë Rusisë, në vitin
1974, përkthim që i kushtoi shkrimtarit njëzet vjet internim. Më pas edhe dëbimin
nga vendi. Atëherë disidenti i madh shkoi në Zvicërr e më pas në SHBA. Sollzhenicin,
që u takua me Gjon Palin II në tetor 1993, i rikthyer në atdhe pas ndryshimeve të
viteve ’90, vijoi t’i kundërvihej regjimit të ri, duke vërejtur se nuk mund të flitet
për kërcënime kundër demokracisë, në një vend ku demokracia nuk ekziston fare. Ikonë
e disidencës sovjetike dhe e antikomunizmit, me vdekjen e Aleksandër Sollzhenicinit,
letërsisë ruse do t’i mungojë shkrimtari më i madh bashkëkohor, njeriu që me guxim
të pashoq e dashuri të pakufishme për të vërtetën, i tregoi botës turpin e Gulagëve,
kampeve të përqendrimit, ku vdiq ajka e mendjes ruse. E ai e njohu nga afër këtë realitet,
ku jetoi tetë vjet, i akuzuar si tradhtar i Atdheut në vitin 1945 e ku lindën veprat,
që do t’i siguronin çmimin Nobel. Shkrimtari i madh rus do të varroset të mërkurën
e ardhshme në manastirin Donskoj të Moskës, vend që e zgjodhi vetë pesë vjet më parë.
Sipas Agjensisë Interfax, zëdhënësi i Patriarkanës së Moskës njoftoi se trupi i autorit
të ‘Arkipelagut Gulag’ është vendosur në katedralen e manastirit për salikimet. Kujtojmë
se Sollzhenicin ishte i krishterë praktikant.