Papa vijon pushimin në Bresanone, nga ku sot kremtoi Engjëllin e Tënzot.
(03.08.2008 RV)Vijojnë me lutje,
studim e prehje pushimet e Benediktit XVI në Bresanone, ku sot Ati i Shenjtë kremtoi
lutjen e Engjëllit të Tënzot të së dielës. Kremtimi u mbajt në sheshin para Katedrales,
në prani të nëntë mijë besimtarëve. Ishte takimi i parë publik me Benediktin XVI.
Më 6 gusht parashikohet takimi i Papës me të gjithë meshtarët e dioqezës, në katedralen
e Bresanones. Si në të kaluarën, do të jetë një takim privat, me pyetje-përgjigje
ndërmjet Benediktit XVI e meshtarëve. Më 9 gusht, pastaj, duhet të organizohet ceremonia
për t’i dhënë Benediktit XVI titullin ‘Qytetar nderi’, ndërsa më 10 gushtin e ardhshëm
besimtarët do të mblidhen përsëri për Lutjen e dytë të Engjëllit të Tënzot, kremtuar
në Bresanone. Përveç këtyre takimeve, gjithë programi i pushimeve papnore ka karakter
privat. Ndërkaq Benedikti XVI i fton besimtarët të luten që mbarë populli i Zotit
t’i përgjigjet thirrjes së përbashkët për të ecur në rrugën e shenjtërisë e të misionit,
duke u impenjuar vazhdimisht për formimin shpirtëror e kulturor. Këto fjalë të Papës
i gjejmë në ndjetin misionar të apostullimit të uratës për muajin gusht.