(04.08.2008 RV)Sot, në emisionin
e tretë të ciklit radiofonik “Me Nënë Terezën”, që bazohet tek libri ‘Jeta
ime’, e Lumja shqiptare prek një nga problemet më të mprehta, që kanë të bëjnë
me veprimtarinë e Kongregatës së themeluar prej saj, e cila vepron edhe në vende me
regjime diktatoriale, antifetare: atë të impenjimit të klerit në politikë. ‘Ne nuk
merremi me politikë’ – titullohet tregimi i saj i sotëm:
“Nisëm veprimtarinë
në Filipine. Kur arritëm, gjetëm tri shtëpi të gatshme për banim: një për fëmijët,
një tjetër për njerëzit në prag të vdekjes e një për motrat. Pak para se
të hapej shtëpia, nëntë të rinj kërkuan të hyjnë në Kongregatë. Në këtë
vend, disa priftërinj e rregulltarë janë në burg, për shkak se i kundërvihen qeverisë
së Ferdinando Markos. Kush komandon, nuk duron kritika. Prandaj
ne i shmangemi çdo lloj veprimtarie politike. Herën e parë që shkova në
Etiopi, një meshtar vendas më tha: “Motrave tuaja u mungojnë përgatitja
e kualifikimi. U mungon kryesorja”. E dëgjova e heshta. Nuk përgjigjemi
kurrë, kur na kritikojnë. Bëjmë çmos të punojmë sa më mirë që mundemi, duke i lënë
veprat tona të flasin për ne. Tani, po ky prift, na thotë: “Ju
po e shpëtoni Kishën në këtë vend. Të gjithë meshtarët e rregulltarët po dëbohen që
këtu. Vetëm ju ju pranojnë me kënaqësi”. E kjo është aq e vërtetë, sa po
na kërkojnë të hapim qëndra të reja. Ne nuk duam të ngatërrohemi me politikë. E
vetmja gjë që dëshirojmë, është të bëjmë punën tonë për Krishtin. Isha një
herë në Adis Abeba, kryeqytet i Etiopisë, në një kohë kur qeveria po i dëbonte misionarët
e huaj, pas një paralajmërimi të bërë pak orë më parë. Kryeministri më
siguroi: “Do të duhej t’i dëbonim të gjithë, por nuk mund të lejoj që motrat
tuaja të ikin nga vendi ynë, sepse më kanë njoftuar, por e kam parë edhe me sytë e
mi, se ju i doni të varfërit e punoni për ta”. Siç dihet, pas revolucionit,
që rrëzoi perandorin e Etiopisë nga froni, këtu u vendos regjimi komunist. Gjatë
qëndrimit tim këtu, shkova tek një ministër, për t’i kërkuar truallin e përshtatshëm
për një spital, në zonën ku punonim ne. Ministri më tha: “Këtu
jemi në regjimin komunist e besojmë se asistenca e të sëmurëve është detyrë që i takon
shtetit e jo individëve ose grupeve të veçanta. Iu përgjigja: “Po ju nuk
po e kryeni këtë detyrë!”. “Po, është e vërtetë – pranoi ministri – Prandaj
do t’ju ndihmoj ta siguroni truallin e nevojshëm për spitalin tuaj… Kështu
tani mund të merremi me të sëmurët… Prandaj nuk merremi me politikë, sepse
merremi me të sëmurët, dmth me Krishtin!”.