Takim i rëndësishëm i Bartolomeut I me Aleksein II për të përmirësuar marrëdhëniet
ndërmjet Kostandinopojës e Moskës. I pranishëm edhe Kryepeshkopi i Tiranës, Anastasi.
(31.07.2008 RV)Hapa përpara në rrugën për bashkimin e ortodoksisë. Bartolomeu
I e Aleksei II, gjatë bisedimeve në Kiev të Ukrainës, premtojnë se Kostandinopoja
e Moska do t’i përmirësojnë marrëdhëniet dhe do t’i kapërcejnë përçarjet ndërmjet
ortodoksëve të Ukrainës. “Vendosëm të punojmë së bashku, për të përmirësuar marrëdhëniet
ndërmjet dy Kishave ortodokse, asaj të Rusisë e asaj të Kostandinopojës, sepse të
dyja palët përgjigjen njëlloj për unitein e ortodoksisë”. Kështu u shpreh Bartolomeu
I, Patrik ekumenik i Kostandinopojës, pas takimit me Patrikun e Moskës, Aleksein II.
Bisedimi, me dyer të mbyllura, u zhvillua të dielën e kaluar në Kiev, në selinë e
metropolitit Vladimir, pas përfundimit të kremtimeve për 1020 vjetorin e krishterimit
në Ukrainë. Në se festimet u paraprinë nga shumë zhgënjime e keqkuptime ndërmjet
Moskës e Kostandinopojës, përfundimi i ngjarjes i kënaqi të dyja palët. Bartolomeu
nënvizoi se takime të tilla janë shumë të nevojshme, sepse kontribuojnë për thellimin
e dialogut e për zgjidhjen e problemeve të mbetura pezull ndërmjet kishave ortodokse
motra. Fjala është për përçarjet ekzistuese, në rritje, ndërmjet ortodoksëve ukrainas.
Në takimin e Kievit - pohoi Aleksei II – u thelluam në diskutimin e mosmarrëveshjeve
dhe jemi një mendjeje se delegacionet e bashkësive tona duhet të gjejnë rrugën e përbashkët”. Atmosfera
pozitive e bisedimeve u vulos me një liturgji ekumenike, kryesuar nga Bartolomeu I,
në bashkëkremtim me Aleksein II; kryepeshkopin e Athinës, Hieronimos; kryepeshkopin
e Tiranës, Anastasios; metropolitin e Kievit, Vladimir dhe përfaqësuesit e Kishave
ortodokse vendase. Gjatë predikimit, Patriku i Kostandinopojës vuri theksin mbi bashkimin
e Kishës dhe rreziqet e përçarjes, që e fyejnë Zotin dhe i bëjnë të pavlefshme dhuratat
e Shpirtit Shenjt për ata që i shkaktojnë ose që mbajnë qëndrim indiferent ndaj këtyre
përçarjeve. Ndërsa Aleksei II, në përshëndetjen e tij, deklaroi se bashkimi i
ortodoksisë ruse nuk mund të mos e pranojë krijimin e shteteve sovrane, të krijuara
pas shpërbërjes së Bashkimit Sovjetik, duke theksuar se Moska e respekton sovranitetin
e tyre dhe interesohet për mirëqenien e popujve të këtyre vendeve. Në fund të kremtimeve
- sipas AziaNjuz – Aleksei II dha njoftimin e rëndësishëm se do të marrë pjesë në
sinodin mbarë-ortodoks, që do të mblidhet në Stamboll në tetorin e ardhshëm, pas një
mungese prej 8 vjetësh.