Ipeshkvijtë afrikanë impenjohen në ungjillëzimin e kulturave të kontinentit, për t’iu
përgjigjur sfidave të shekullarizimit.
(30.07.2008 RV)“Ungjillëzimi i kulturave dhe inkulturimi i Ungjillit në Afrikë,
kërkojnë rishtas dëshmitarë të ri, profetë e shenjtorë”. Kështu shkruan, në një artikull,
botuar në gazetën vatikanase ‘L’Osservatore Romano’, sekretari i Këshillit Papnor
të Kulturës, atë Bernard Ardura, duke komentuar takimin e organizuar prej dikasterit
papnor në Bagamojo të Tanzanisë, nga 23 deri më 26 korriku i kaluar, me temë “Perspektivat
baritore për Ungjillëzimin e ri, në kontekstin e globalizimit dhe të pasojave të tij
mbi kulturat afrikane”. “Të ungjillëzosh kulturën e të inkulturosh Ungjillin, është
mision sa i lashtë, aq edhe i ri”: kështu shkruan Papa në mesazhin, që u lexua në
hapjen e takimit. Benedikti XVI i porositi ipeshkvijtë afrikanë, të mbledhur nga të
katër anët e Kontinentit, të gjejnë mënyra të reja e të suksesshme për të paraqitur
të vërtetën e pandryshueshme të Ungjillit e sidomos vlerat e gëzimit të jetës, të
respektit për fëmijën që pritet të lindë, rolit të rëndësishëm të familjes, të bashkimit
e të solidaritetit, karakteristike për kulturat afrikane.