(26.07.2008 RV)Të shikosh si kalon Jezusi, i ngarkuar me Kryq, nëpër rrugët
moderne të metropolit e si ngjitet në Kalvar, ndërmjet të krishterëve të shekullit
të 21-të! Kjo ndodhi me shfaqjen e Udhës së Kryqit në rrugët e Sidneit, të premten
e kaluar. Në praninë e Papës, të rinjtë e Ditës së 23-të Botërore të Rinisë, rijetuan
misterin e Mundimeve të Krishtit, në heshtjen e thellë të lutjes, që tërhoqi vëmendjen
e mediave të mbarë botës. Edhe kjo është një mënyrë për ta bërë të dukshme Kishën,
pikërisht në vendet ku shpesh mbretëron indiferenca e frenezia. E nënvizon, në notën
e mëposhtme, drejtori i Sallës së Shtypit të Vatikanit dhe drejtori ynë i përgjithshëm,
Atë Federiko Lombardi:
“Një nga çastet kulmore të DBR-së së Sidneit
ishte, pa dyshim, Udha e Kryqit që kaloi mes-për-mes metropolit kozmopolit. Qyteti
i madh shekullor ndoqi me habi plot respekt, shfaqjen, në dukje moderne, të një ngjarjeje
të lashtë, por me një aktualitet tepër të thellë, të përhershëm. Rikujtimi
i stacioneve të mundimeve të Krishtit përshkoi vendet më simbolike të qytetit – Operën,
Urën, portin e i bëri dëshmitarë të një misteri, me të cilin lidhen burri e gruaja
e të gjitha kohëve në çastet e dhimbjes, të ballafaqimit me të keqen brenda e jashtë
vetes, me dhunën e me vdekjen. Në historinë e botës, nuk ka rrëfim që e
trandë më fort ndërgjegjën e njeriut, se Mundimet e Krishtit, thelb i Ungjillit.
Është meritë e madhe e DBR-së së Sidneit – ashtu edhe si e ditës së Torontos – impenjimi
në mënyrë kaq të jashtëzakonshme, për t’ia ripropozuar jo vetëm të rinjve pjesëmarrës,
por edhe qytetit, që i mikpriste. Është një kumt i madh e i guximshëm, që kërkon ta
vërë shfaqjen në shërbim të mesazhit shpirtëror e të lutjes. Ishte shfaqje, natyrisht,
por shfaqje ‘ kishtare’, në hullinë e traditës së krishterë. Përballë e
përreth Jezusit, që vuan e vdes, aktorë të tjerë, e jo thjeshtë spektatorë, jemi ne.
Qyteti i madh shekullor nuk qëndron indiferent, por reflekton, i bën vetes pyetje
të vështira. Ashtu si qyteti i madh i Ninives, që ia vë veshin Jonës Profet dhe, të
paktën për një ditë, kupton se njeriu ‘nuk jeton vetëm me bukë’. E ndoshta-ndoshta
jo vetëm për një ditë, sepse nuk është e lehtë t’i harrosh ato kryqe në perëndim,
në skaj të molos së Barangarusë, gjatë brigjeve të gjirit të detit. Kryqi
i Krishtit, që vdiq e u ngjall për ne, mbetet fjala më e fuqishme e shëlbimit, që
na u dha për ta kumtuar, ‘masa’ më e sigurtë e jetës sonë, ashtu siç tha Papa. Bëjnë
mirë të rinjtë që e provojnë, sepse kështu do të jetë edhe në qytetet e së nesërmes,
në mijëvjeçarin e tretë e në ata që do të vijnë pas”.