Papa priti në Kastel Gandolfo kryeministrin irakian, Al Maliki: dënim i përbashkët
i terrorizmit.
(25.07.2008 RV)Sot, në Pallatin
Apostolik të Kastel Gandolfos, Benedikti XVI priti në audiencë shkelqësinë e tij,
Nuri Kamel al–Maliki, kryeministër i Republikës së Irakut. Papa dhe kryeministri irakian
dënuan bashkërisht terrorizmin. Më pas ripohuan vlerën e madhe të dialogut ndërfetar,
duke e parë si rrugë për mirëkuptimin fetar e për bashkëjetesën civile. Kryeministri,
i cili dje zbriti në Kriptën e Vatikanit për të nderuar kujtimin e Gjon Palit II,
e ftoi Papën të vizitojë Irakun. Para takimit me Benediktin XVI, kryeministri
Maliki vizitoi edhe sekretarin e Shtetit të Vatikanit, kardinalin Tarçizio Bertone,
që shoqërohej nga Sekretari i Vatikanit për marrëdhëniet me shtetet, imzot Dominik
Mambertì. Bisedimet – saktëson një notë e Sallës së Shtypit të Vatikanit - zhvilluar
në një atmosferë të përzemërt, u përqendruan tek disa aspekte themelore të situatës
irakiane, duke pasur parasysh edhe kontekstin zonal. Vëmendje e posaçme iu kushtua
temës së refugjatëve të shumtë irakianë, brenda e jashtë vendit, që kanë nevojë për
asistencë edhe në rast se krijohen kushte për t’u rikthyer në atdhe, gjë që urohet
të ndodhë sa më shpejt. U dënua përsëri dhuna e cila pothuajse çdo ditë trondit
pjesë të ndryshme të vendit, pa kursyer bashkësitë e krishtera, që e ndjejnë më shumë
se kurrë nevojën për të qenë më të sigurta. E kjo, sepse vitet e fundit bashkësia
e krishterë po i nënshtrohet gjithnjë më shumë persekutimit, gjë që e dëshmojnë disa
ngjarje tragjike. Kujtojmë se më 3 qershor 2007, në Mosul, u vranë famullitari i Kishës
së Shpirtit Shenjt, atë Reget Ganni me tre diakonë; në shkurt 2008 u rrëmbye dhe u
vra imzot Paulos Farai Rahho, kryeipeshkvi kalde i Mosulit. Është derdhur pra, gjak,
por nuk kanë munguar as shqetësime të tjera, që nuk pasqyrohen nga mediat, si sulmi
kundër kryeipeshkvisë së Mosulit në dhjetor të vitit 2004; bombat kundër kishave në
vitet e mëpasme; rrëmbimi në janar 2005 i ipeshkvit siro-katolik të Mosulit, imzot
Gjorgj Kasmusa e i shumë të krishterëve irakianë. Qindra-mijëra njerëz detyrohen të
braktisin vendin, për shkak të dhunës së vazhdueshme e të krizës së thellë ekonomike.
Megjithatë, në një skenë kaq dramatike, nuk mungojnë as shenjat e shpresës. Gjatë
takmit të sotëm, të dyja palët uruan që Iraku të gjejë vendosmërisht rrugën e paqes
e të zhvillimit, përmes dialogut e bashkëpunimit të të gjithë grupeve dhe etnive fetare,
përfshirë edhe pakicat të cilat, duke respektuar identitetet përkatëse, me frymën
e pajtimit e të kërkimit të së mirës së përbashkët, duhet të punojnë së bashku për
rindërtimin moral e civil të vendit. U ripohua me forcë edhe rëndësia e dialogut ndërfetar,
si rrugë për mirëkuptimin fetar e bashkëjetesën qytetare. Pas përfudimit të takmit,
Benedikti XVI e Al-Maliki shkëmbyen dhuratat tradicionale: Papa mori si dhuratë nga
mysafiri i largët, një palmë argjendi, ndërsa dhuroi një penë përkujtimore, realizuar
me rastin e 500-vjetorit të Bazilikës së Shën Pjetrit.