У Івянцы закончылася Міждыяцэзальная Сустрэча Моладзі
Раніцай 20 ліпеня 2008 г. у Івянцы распачалася ўрачыстая святая Імша на завяршэнне
Міждыяцэзіяльнай сустрэчы моладзі. Цэлебраваў яе Мітрапаліт Мінска-Магілёўскі арцыбіскуп
Тадэвуш Кандрусевіч, Апостальскі Адміністратар Пінскай дыяцэзіі кардынал Казімір Свёнтэк,
дапаможны біскуп Пінскай дыяцэзіі Казімір Велікаселец, Апостальскі Візітатар для грэка-католікаў
Беларусі архімандрыт Сяргей Гаек і шматлікія святары. Арцыбіскуп Тадэвуш прамовіў
гамілію, у якой, між іншым, адзначыў: «Свет і чалавек — гэта поле пастаяннай барацьбы
дабра і зла, і ў гэтай барацьбе Бог чакае, чакае да канца, чакае ажно да жніва, каб
чалавек навярнуўся, бо Ён багаты на міласэрнасць, як навучае св. Апостал Павел».
«Бог не мсцівы, але любячы Айцец, — працягваў Мітрапаліт. — Велічыня Бога праяўляецца
ў Яго велікадушнасці, і гэта азначае, што Ён прабачае і дапамагае чалавеку навярнуцца.
Ён умацоўвае чалавека ў надзеі, у якой мы збаўленыя, як навучае Святы Айцец Бэнэдыкт
XVI». Напрыканцы свайго выступлення арцыбіскуп заклікаў: «Кожны з нас, усе
мы таксама пакліканыя да вельмі адказнай місіі — абвяшчаць Евангелле ў сучасным свеце,
быць місіянерамі, несці Добрую Навіну сучаснаму чалавеку. У Хрыста няма іншага плана.
Мы ўсе павінны стаць сучаснымі Апосталамі, асабліва сучасным „Паўламі“, вера якога
не была тэарэтычнай, але праяўлялася ў бясконцай любові да Бога, як кажа Папа Бэнэдыкт
XVI. Гэтую веру ён нёс усім народам праз абвяшчэнне Евангелля і асабістае сведчанне
аб Хрысце. Няхай нашым гонарам, заданнем і абавязкам будзе асвячаць свет збаўчаю праўдаю
Езуса Хрыста, у якой Ён зможа вырашыць усе свае праблемы і дасягне збаўлення. Калі
не мы, то хто? Калі не сёння, то калі?», — гэтымі словамі арцыбіскуп Тадэвуш завяршыў
сваю прамову. Перад удзяленнем благаслаўлення ў чарговы раз адбылося прамое
ўключэнне з Сіднэя, і ўсе прысутныя на Літургіі маглі назіраць за развітаннем Папы
Рымскага з моладдзю ў Сіднэі. Пасля прамога ўключэння з Аўстраліі
Мітрапаліт Мінска-Магілёўскі шчыра падзякаваў усім тым, хто прысутнічаў на ўрачыстай
супольнай малітве і ўсім тым, хто прычыніўся да арганізацыі гэтай трохдзённай моладзевай
сустрэчы. Вернікі далучыліся да падзякі гучнымі апладысментамі і радаснымі воклічамі. паводле
Catholic.by