365 ditë me njerëz e ngjarje që ia ndryshuan faqen botës: "Martirët e Vietnamit".
(21.07.2008 RV)Maj 1640. Shiu bie me rrëmbesë. Si çdo vit, në Vietnam ka arritur
monsoni. Në hyrje të gjykatës duken dy roje. Shoqërojnë në sallë të burgosurin Tomaz
Tin. Gjykatësi e pyet me zë të egër: “Si guxove të braktisësh fenë e paraardhësve
për t’u kthyer në fenë e portugezëve. “Zoti kryetar”, përgjigjet Tomazi me zë të
fuqishëm, “në se unë e shokët e mi zgjodhëm një fe të predikuar nga të huajtë, kjo
nuk do të thotë se nuk kemi respekt për paraardhësit tanë, të cilët i nderojmë me
gjithë zemër; aq më pak, se nuk e çajmë kokën për vendin tonë. Zoti që adhurojmë nuk
u përket vetëm portugezëve. Ashtu si dielli i ndriçon të gjitha kombet e tokës, kështu
edhe Hyji i misionarëve portugezë, italianë a francezë, është edhe Zoti ynë”. Ndërsa
përgjigjet, Tomazi e ul paksa kokën, në shenjë respekti. Por kjo nuk e zbut fare kryetarin
e gjykatës, të cilit përkundrazi, i duket se po trajtohet pa pikën e respektit. Përgjigja
e Tomazit i duket tejet fyese. Prandaj, pa e zgjatur shumë, merr një vendim të prerë:
vdekje! Pasi arrin tek vendi i ekzekutimit, Tomazi zemërohet, kur dëgjon aktakuzën.
“Mbreti vendos të pushkatohen të gjithë ata, që respektojnë ligjin e portugezëve”.
Tomazi e di se ta bindësh tjetrin, duke e paguar, është në kundërshtim me virtytet
e krishtera, por në se bëhet për një kauzë të shenjtë, ndoshta-ndoshta… Nxjerr nga
xhepi kacillet e fundit që i kanë mbetur e i përdor për të ndryshuar akt-akuzën. Fjalët
‘ligjin e portugezëve’ zevendësohen me ‘ligjin e Zotit të qiellit e të tokës”. Tomaz
Tin nuk është i krishteri i parë që jep jetën në emër të fesë e, për fat të keq, nuk
do të jetë as i fundmi. … Në shekullin XVII, në Vietman, krishterimi nuk pranohet
aq lehtë. Të krishterët akuzohen se nuk i nderojnë paraardhësit e se nuk e respektojnë
perandorin. Kanë guximin të nderojnë më shumë ‘Zotin e qiellit”, sesa sovranin e tyre,
që është bir i qiellit. Mandarinët, e pas tyre edhe populli, janë të bindur se të
krishterët duan të dalin nga rruga e urtisë. Prandaj duhen persekutuar pa pikë mëshire.
Ndërmjet viteve 1640 e 1862 më se 70 mijë të krishterë vitnamezë do të derdhin gjakun
për fenë. Kisha vietnameze lindi nga gjykatat, prej tribunave të të cilave të sapokthyerit
në fenë e Krishtit dëshmuan se është e mundur të besosh në Zotin e, njëkohësisht,
t’i qëndrosh besnik paraardhësve dhe vendit tënd.