Mbresat e para nga DBR-së dhe vizita e Papës: me ne Atë Federiko Lombardi.
(20.07.2008 RV)Nesër Papa do të kalojë ditën e fundit të shtegtimit të tij
në Sidnei. Pas përshëndetjes së 12 mijë vullnetarëve të DBR-së, do të shkojë në aeroportin
ndërkombëtar të qytetit australian, ku do të zhvillohet ceremonia e lamtumirës e pastaj
do të niset për Romë. Por për Ditën e 23-të Botërore të Rinisë, të dëgjojmë komentin
e drejtorit tonë të përgjithshëm, Atë Federiko Lombardi: Pyetje:
- Atë Lombardi, një përshtypje të shpejtë për këtë Ditë Botërore të Rinisë…
Përgjigje:
- Është Ditë unike, natyrisht, sepse u zhvillua në një mjedis shumë të
veçantë, në atë të Australisë. Admiroj impenjimin e australianëve e të Kishës australiane,
falë të cilit u arritën rezultate vërtetë të dukshme, si për numrin e të rinjve që
erdhën e për mënyrën si u zhvilluan manifestimet, ashtu edhe për pjesëmarrjen e gjithë
qytetit. Posaçërisht Udha e Kryqit ishte një çast i veçantë, sepse, e kremtuar nëpër
udhët e vendet më domethënëse të qytetit, i preku e i nxiti të gjithë të reflektojnë.
Doli edhe njëherë në pah fakti se tradita e lashtë e Udhës së Kryqit vlen edhe për
sot, për të propozuar me fryt një çast themelor të misterit të krishterë.
Pyetje:
- Atë Lombardi, po bëhet traditë, pas Këlnit, edhe adhurimi eukaristik…
Përgjigje:
- Po, në Natën e lutjes, që tradicionalisht ka pasur pamjen e festës, me
këngë e me veprimtari të tjera, që duhet të vijojnë, të paktën pjesërisht, që nga
Këlni u përfshi edhe ky element i posaçëm e i ri i adhurimit eukaristik. Sipas meje
qe një akt i guximshëm, sepse nuk ishte e qartë në se do të realizohej me pjesëmarrje
e lutje kaq impenjative, e do të jetohej me gjithë shpirt, shoqëruar me këngë e me
reflektime të shkurtëra. Është një mesazh, që vë në dukje rëndësinë e uratës në qendër
të jetës së krishterë e edhe të kësaj forme të posaçme të lutjes, që është adhurimi,
shoqëruar me heshtjen para Zotit.
Pyetje: -
Ç’mund të na thoni për tonin e për fjalimet e Benediktit XVI në këtë DBR-së?
Përgjigje:
- Ishte një katekizëm shumë i zgjëruar mbi jetën e krishterë: përqendruar
mbi temën e Shpirtit Shenjt, por që nisi nga Pagëzimi, për të arritur tek Krezmimi,
sakrament karakteristik i kësaj DBR-së. Papa foli, foli gjatë, foli qartë, por fjalimet
e tij patën një përmbajtje shumë të pasur, të thellë, që nuk është lehtë të kuptohet
menjëherë, sepse tepër e pasur me koncepte, por edhe me ndjenja shpirtërore. Këtë
thellësi shpirtërore e prekëm posaçërisht kur Papa foli për të rinjtë që kalojnë vështirësi,
të cilëve u propozoi jetën e krishterë, si rrugë që të shëron shpirtin, të sjell paqen
e të pajis me dashurinë, e cila bëhet shenjë pozitive edhe për të tjerët, sepse
kush i ka provuar vetë vështirësitë, i kupton më mirë edhe vështirësitë e të tjerëve.