Kardinali Toran në Madrid: “Hebrenjtë, të krishterët e myslimanët janë forcë e jashtëzakoshme,
për t’i dhënë shoqërisë fytyrë njerëzore”.
(19.07.2008 RV)“Të vlerësohen themelet e përbashkëta të feve të mëdha monoteiste,
për të ndërtuar ardhmërinë paqësore ndërmjet popujve”. Këtë theksoi dje kardinali
Zhan Lyi-Toran, kryetar i Këshillit Papnor për Dialogun Ndërfetar nga tribuna e Konferencës
ndërfetare të Madridit, me pjesëmarrjen e autoriteteve të islamit, kristianizmit e
të hebraizmit, organizuar nga mbreti saudit, Abdallah. Me takimin e Madridit, hebrenjtë,
të krishterët e myslimanët dëshmuan se ‘fetë nuk janë burim tensioni”, por përkundrazi,
forcë pozitive e jashtëzakonshme për t’i dhënë shoqërisë një fytyrë vërtetë njerëzore
- vijoikardinali Toran, i cili e falënderoi mbretin saudit për nismën e Konferencës
ndërfetare. Hirësia e Tij, që e quajti ‘historik’ takimin, u përcolli pjesëmarrësve
përshëndetjen e dhe inkurajimin e Papës, i cili – vijoi kardinali – shpreh bindjen
se dialogu i bazuar mbi dashurinë e të vërtetën, është rruga më e mirë për t’u siguruar
mbarë popujve të tokës, harmoninë, lumturinë e paqen. Në Madrid - pohoi kryetari i
Këshillit Papnor për Dialogun Ndërfetar – u hap një rrugë e re për dialogun, lindën
miqësi të reja, frymëzim i ri. Kardinali Toran vuri theksin sidomos mbi bindjet
e thella, që i bashkojnë besimtarët e tri feve monoteiste: besimi në një Zot të vetëm,
përgjegjësisa për të mbrojtur Krijimin, shenjtëria e njeriut, interesi i përbashkët
për t’u ofruar të rinjve parime morale e, akoma, forca e dashurisë dhe qendërsia e
ligjit natyror. Më pas kardinali Toran u ndalua tek liria fetare, një imperativ
që nuk mund të kufizohet thjeshtë në nevojën për të pasur vende të kultit. Liria fetare
– reflektoi Hirësia e Tij – duhet të përfshijë edhe mundësitë që besimtarët të luajnë
një rol aktiv në sferën publike, përmes përgjegjësive kulturore, politike e shoqërore.
Në këtë kontekst, kreu i Vatikanit vuri theksin mbi tri objektiva: thellimi i njohjes
reciproke, zhvillimi i studimeve fetare e formimi i njerëzve për dialogun ndërfetar,
pa harruar se fetë nuk janë pak a shumë e njëjta gjë, ndërsa është e vërtetë se të
gjithë njerëzit që kërkojnë Zotin kanë të njëjtin dinjitet. Dialogu ndërfetar – vijoi
kardinali - nuk mund të ndërtohet mbi dyshime. Duke u larguar nga Madridi – përfundoi
Hirësia e Tij – kemi më shumë besim, të bindur se me ndihmën e Zotit, do ta bëjmë
njerëzimin një familje të vetme.