Në Sidnei Papa takohet me 500 mijë të rinj të DBR-së, të cilët i fton të mos e përjashtojnë
Zotin, të mbrojnë jetën e gjithësinë.
(17.07.2008 RV)Në Sidnei, takimi
i parë entuziast i Papës me të rinjtë, që marrin pjesë në Ditën e 23-të Botërore të
Rinisë. Edhe një herë skela e Barangarusë, ku pardje u hapën kremtimet e DBR-së me
Meshën Shenjte, kryesuar nga kardinali Gjorgj Pel, kryeipeshkëv i qytetit, qe korniza
e festës së mikpritjes, në të cilën ishin të pranishëm përfaqësues të rinisë nga mbarë
bota. Por, për të jetuar emocionet e kësaj feste mbarërinore, të ndjekim, drejtpëdrejtë
nga Barangaru, të dërguarin e Radio Vatikanit në DBR-së, Roberto Piermarini:
“Një
shpërthim duartrokitjesh e këngësh të hareshme: 500 mijë vetë e pritën Papën, që arriti
në molon e Barangarusë mbi një anije të bardhë, pas lundrimit gjatë brigjeve të gjirit
të Sidneit, i rrethuar me një kurorë prej 12 varkash, plot me të rinj. Duke kaluar
para velave të bardha të Shtëpisë së Operas, ndërtesë-simbol i Australisë, ngërthyer
si margaritar në zemër të gjirit të Sidneit, Papa u rrethua nga 16 të rinj, 12 përfaqësues
të katër kontinenteve, 4 të kontinentit australian. Në Barangaru Benedikti
XVI u prit me një valle aborigjene e me një këngë tipike në gjuhën galidal. Mirëseardhjen
ia uroi kryeipeshkvi i Sidneit, kardinali Pel, i cili e priti Benediktin XVI si pasardhës
të Pjetrit dhe i kujtoi ‘Të madhin, Gjon Pali II’, autorin e këtyre ditëve botërore
rinore, dy herë radhas, shtegtar në Australi. Prekës procesioni i Librit liturgjik,
që përmbledh fragmentet e Ungjillit, të cilat lexohen në Meshët solemne gjatë vitit,
vendosur mbi një kanoa, vepër simbolike arti, sepse popujt e Oqeanisë e konsiderojnë
Zotin si ‘peshkatar i madh’. Në fjalimin drejtuar të rinjve, Papa preku
temat që përshkojnë gjithë vizitën e tij. Kujtoi vuajtjet dhe padrejtësitë e pësuara
nga aborigjenët dhe mbrojtjen e ambientit. E këtë e bëri duke treguar se u shqetësua
për fluturimin e gjatë nga Roma, por pastaj, gjatë këtij fluturimi, mundi të admirojë
mrekullitë e gjithësisë. Gjithsesi - vijoi Benedikti XVI – duhet të pranojmë se
tepër plagë i hapen tokës: erozioni, shpyllëzimi, shpërdorimi i pasurive minerale
e detare, për të ushqyer konsumizmin e pangopur, ndërsa shumë vende kërcënohen nga
rritja e nivelit të ujit ose nga thatësira. Por Papa nuk preku vetëm plagët ambientale:
vuri gishtin edhe mbi plagët shoqërore, siç janë shpërdorimi i alkoolit e i drogës,
ushtrimi i dhunës dhe zvetënimi seksual, të cilat mund ta shpërfytyrojnë qëllimin,
për të cilin jemi krijuar. E kjo - nënvizoi Ati i Shenjtë – ndodh sepse shpesh herë
liria e toleranca kuptohen shtrembër, veçohen nga e vërteta. Për botën, nuk ekziston
një e vërtetë, që mund t’i prijë në rrugën e saj. Relativizmi vlerëson mbi të gjitha
‘përvojën’, e cila në këtë mënyrë shkëputet nga e mira dhe e çon njeriun drejt një
një lirie të rreme, drejt pështjellimit moral ose intelektual, drejt humbjes së nderimit
për vetveten e madje, edhe drejt dëshpërimit. “Christ offers more! Indeed
he offers everything!...” Krishti na jep shumë më tepër, na jep gjithçka!
Vetëm Ai, që është e Vërteta, mund të jetë Rruga e, edhe Jeta, që na dhurohet përmes
pagëzimit. Pikërisht me pagëzimin, Zoti na prin drejt shenjtërisë, na bën bij në shpirt
e na krijon mundësinë për t’u shndërruar në krijesa të reja. Zoti nuk mund të lihet
mënjanë, feja nuk mund të kufizohet në sferën individuale, besimi e feja nuk mund
të përjashtohen nga jeta publike. Është një vizion i shekullarizuar – vërejti Benedikti
XVI – që dëshiron ta formojë shoqërinë pa Zot, por kjo shkapje (shkëputje) nga Plani
i Tij, shkakton një çrregullim, që ka pasoja të pashmangshme mbi gjithësinë. Kështu
u shpreh Benedikti XVI e më pas bëri pyetjen: “Ç’vend kanë, në nivel shoqëror, të
moshuarit, të varfërit, emigrantët, njerëzit pa zë? Si mund të frenohet dhuna brenda
mureve të shtëpisë, që trondit nëna e fëmijë? Si të mbrohet prehëri amtar? Si mund
të respektohen mospranimi i dhunës, zhvillimi i qëndrueshëm, drejtësia, paqja, kujdesi
për mjedisin, në se dhunohet dinjiteti i jetës njerëzore nga zënia, deri në perëndimin
e natyrshëm, dhuratë e vetë Zotit, e prandaj, i paprekshëm? “World Youth
Day fills me with confidence for the future…” Dita Botërore e Rinisë
më mbush me besim për ardhmërinë e Kishës e të Botës sonë – pohoi me entuziazëm Papa
- sepse të rinjtë, që kanë marrë këtë rrugë të gjatë e të lodhshme, duan të rrinë
së bashku, që të thellojnë fenë e tyre e të ndajnë bashkërisht përvojën gazmore të
bashkimit në Kishën e Krishtit.Së fundi, thirrja drejtuar gjithë të rinjve
të mbledhur në Sidnei, të kenë guximin për të ecur në rrugën e shenjtërisë, sepse
pikërisht për këtë rrugë ka nevojë më shumë se kurrë bota e sotme.