365 ditë me njerëz e ngjarje që ia ndryshuan faqen botës: "Maria Gijard përpilon një
katekizëm në indishten algonkine".
(16.07.2008 RV)Nuk është natë e këndshme për miqtë e vegjël të motrave orsoline
të qytetit të Kebekut. Në kuvend shpërthen flaka e, me që ndërtesa është prej druri,
të gjithë dalin me vrap përjashta! E tani vajzat e vogla, në këmishë nate, me këmbët
e zbathura mbi dëborë, shikojnë fjetoren si zhduket, e mbështjellë nga një re e dendur
tymi. Fëmijët dridhen, Netët e dimrit në Kanada janë tejet të ftohta. Në dritën
luhatëse të flakëve duken e zhduken disa fytyra me mollëza e spikatura e me kaçurela
të zez: janë indianet urone ose algonkine, bija prindërish të krishterë, të cilët
ua kanë besuar rregulltareve. Shihen edhe disa fytyra të zbehta, rrethuar me flokë
të artë: janë bijat e kolonëve francezë, që jetojnë në Kanada. Të gjitha këto vajza
të vogla, të pushtuara nga frika, gjysëm të ngrira, nuk dëshirojnë tjetër, veçse
të rikthehen në krevatin e ngrohtë, për të vijuar gjumin e lënë pëgjysëm. Disave u
kërcasin dhëmbët nga e ftohta, të tjerat qajnë me dëshpërim. Po ku është zhdukur
Nënë Maria e Mishërimit, eprorja e kuvendit? Ah, ja, po del nga shkolla, pasi kontrolloi
çdo skutë, nga frika se mos mbetej ndokush i bllokuar ndër fjetoret. As ajo nuk pati
kohë t’i mbathte këpucët, ndërsa shtrëngon fort në dorë një libër, të cilin bëri çmos
ta shpëtojë nga flakët: është katekizmi, që ka shkruar në gjuhën algonkine. Iu desh
të punonte vjet e vjet për ta shkruar, prandaj u shqetësua më shumë për të shpëtuar
librin, sesa për të mbathur këpucët. Nënë Maria i mbledh çikat rreth vetes, i
ngroh me dashurinë e saj. E ato shumë shpejt e ndjejnë veten më mirë. Kjo motër është
në gjendje ta mbushë me besim këdo, sepse shpirti i saj është plot me një optimizëm
të pabesueshëm. Ajo e ndërtoi këtë shkollë e, me kalimin e viteve, vijoi ta zgjëronte,
që të mund të zinte një numër sa më të madh vajzash. Më në fund, në vitin 1650, vit
i rënies së zjarrit, ndërtesa ishte gati e përkryer... ndërsa tani duhet rindërtuar…
Po, me ç’para? Pavarësisht nga të gjitha, Nënë Maria nuk është nga ato që dëshpërohen.
Maria Gyijard është shquar gjithnjë si grua guximtare. Me origjinë nga Tur i Francës,
erdhi në Kebek për të dhënë ndihmesën e vet për përhapjen e krishterimit, në këtë
vend të zbuluar një shekull më parë. E tani, në moshën pesëdhjetëvjeçare, është ende
përplot me energji: “Në se duhet të rindërtojmë, me ndihmë të Zotit, do të rindërtojmë!”.
Por ndërkaq duhet gjetur sa më shpejt një strehë për gjithë këto vajza, para se të
bëhen akull. Nënë Maria i bën të vrapojnë, që të ngrohen sadopak. E, duke vrapuar
trokasin në portën e motrave agostiniane: porta u hapet menjëherë. Mund të rrinë aty
derisa ta ndërtojnë rishtas strehën e re.