U kremtua në Jeruzalem, solemniteti i Kushtimit të Bazilikës së Varrit Shenjt.

(15.07.2008 RV)Sot paradite, në Jeruzalem, u kremtua Solemniteti i Kushtimit të Bazilikës së Varrit të Shenjtë, zemër e krishtërimit, që lartohet mbi kodrinën e Golgotës e mbi varrin e Zotit. Bazilika, që hebrenjtë e quajnë “Knessiat ha Kever”, Kisha e Varrit, shpreh përmes emrit që i dhanë arabët, (Kanisah al Qiama) ‘Bazilika e Ngjalljes’, ngjarjen historike, që ndodhi në këtë vend. Zgjedhja e datës 15 korrik për Kushtimin e Bazilikës së Varrit Shenjt, u bë në kohën e kryqtarëve, të cilët e caktuan për të përkujtuar pesëdhjetë vjetorin e hyrjes së tyre ngadhënjimtare në Jeruzalem, më 1099. E në se nga ndërtesa e parë, e ngritur nga perandori Kostandin, shuguruar në vitin 335, nuk ka mbetur asnjë gjurmë, në elementet arkitektonike e zbukuruese të Bazilikës aktuale mund të dallohen akoma gjurmët e kishës së ndërtuar nga kalorësit kryqtarë, në fund të shekullit XI. Gjatë kremtimit eukaristik solemn, kryesuar nga Rojtari i Tokës Shenjte, Atë Pierbatista Picabala, morën pjesë sidomos rregulltarë të krishterë të qytetit të vjetër, por nuk munguan edhe shtegtarët. Ishte një liturgji në latinisht, që mblodhi rreth Anastasis besimtarë nga kombësi të ndryshme. Edhe një herë kumtimi i ngjalljes u lartua drejt qiellit nga Kapela e Engjëllit, para varrit të zbrazët të Zotit. Në liturgjinë, që kremtohet në këtë Bazilikë, lutjet e himnet përsërisin se ‘këtu’, pikërisht në këtë vend, Zoti u ngjall!