Kardinali Bertone: “Prania e të rinjve në DBR-së i kalon parashikimet”.
(14.07.2008 RV)“Vijon vërshimi i të rinjve dhe nga viset për rreth Sidneit,
nga Ishujt e Paqësorit e nga Zelanda e Re. Është hera e parë që këta të rinj marrin
pjesë në një takim të tillë botëror. Gjë e re, e bukur!”. Me këto fjalë kardinali
Tarçizio Bertone, sekretar i Shtetit të Vatikanit, u shpjegoi gazetarëve optimizmin
e Selisë së Shenjtë për pjesëmarrjen masive të të rinjve të afërt e të largët, në
Ditën e tyre Botërore, sidomos në takimin me Benediktin XVI gjatë natës së lutjes
e Meshës së madhe të së dielës. Sipas statistikave të Komitetit organizator, numri
i të rinjve të regjistruar është 225 mijë: 125 mijë australianë, të tjerët nga mbarë
bota. Në organizimin e ngjarjes marrin pjesë 8 mijë vullnetarë. Janë të pranishëm
2 mijë meshtarë, 700 kardinaj e ipeshkvij. Gazetarët e akredituar e kalojnë shifrën
2 mijë, ndërsa shtegtarëve do t’u ofrohen 3 milionë e gjysëm dreka e darka. “Koha
është bukur. Shpresojmë se do të mbajë kështu deri të dielën – shton kardinali Bertone,
duke vijuar të flasë me gazetarët në përfundim të Meshës Shenjte, kremtuar në katedralen
e Sidneit. Papa – konfirmon Hirësia e Tij – tani po pushon e po përgatitet për takimin
e madh me të rinjtë”.