Në letërkëmbimin me kryeministrin britanik, Braun, Benedikti XVI thekson: “Në se nuk
globalizohet solidariteti, uria e varfëria do të vijojnë ta trondisin botën.
(08.07.2008 RV)Të krijohen kushtet paraprake, që pasuritë e tokës të shfrytëzohen
nga të gjithë e krizat ekonomike të Planetit, të zgjidhen me sukses, duke e çliruar
botën nga uria e nga mungesa kronike e ndihmës mjekësore. Me një fjalë ‘të globalizohet
solidariteti’. Sekretari i Shtetit të Vatikanit, kardinali Tarçizio Bertone, i përgjigjet
kështu, në emër të Benediktit XVI, letrës dërguar kohë më parë Papës, nga kryeministri
britanik, Gordon Braun, me theks mbi “Objektivat e zhvillimit të Mijëvjeçarit” të
OKB-së. Letërkëmbimi botohet në numrin e fundit të ‘L’Osservatore Romano’. Është
një shkëmbim shumë aktual mendimesh ndërmjet Londrës e Vatikanit, të cilin kronika
e këtyre ditëve – e interesuar për G8-ës të Toiakos në Japoni – e vë në plan të parë.
Benedikti XVI e Gordon Braun, duke u nisur nga këndvështrime të ndryshme, prekin problemet
më të mprehta, që kanë të bëjnë me vënien në jetë të Objektivave të zhvillimit të
Mijëvjeçarit (MDG): program ambicioz, i konkorduar në vitin 2000 nga 119 shtetet anëtare
të OKB-së, mbi bazën e të cilit vendosej, ndërmjet tjerash, të shrrënjosej në gjithë
botën varfëria, mjerimi, uria; të garantohej shkollimi fillor universal, të reduktohej
vdekshmëria foshnjore nën pesë vjeç, të bllokohej përhapja e Sidës. Të gjitha këto,
brenda vitit 2015. Në letrën drejtuar Papës më 23 maj 2008, Brauni flet troç: “Nuk
po i nderojmë – shkruan kryeministri britanik - impenjimet që morëm në vitin 2000”. Pasi
u hedh një vështrim të shpejtë nismave të solidaritetit, në të cilat Selia e Shenjtë
ka qenë në vijë të parë të frontit në gjithë botën, siç është blerja, sipas dëshirës
së Benedikti XVI, e Obligacionit ndërkombëtar për vaksinimin, që u krijon kushtet
e imunizimit një gjysëm miliard fëmijëve brenda 2015-tës, duke shpëtuar 5 milionë
prej tyre – kryeministri britanik flet për impenjimin e tij në favor të Objektivave
të Mijëvjeçarit. Braun e shikon takimin e nivelit të lartë të 25 shtatorit të ardhshëm,
si ngjarje tepër të rëndësishme sepse – shpjegon ai – pikërisht në këtë mbledhje
të OKB-së do të analizohet ç’është bërë e ç’mbetet për t’u bërë deri në vitin 2015.
E, përfundon me një thirrje: “Pa një aksion me goditje të përqëndruar gjatë këtij
viti, Objektivat e zhvillimit të Mijëvjeçarit do të mbeten vetëm në letër e do të
humbasë edhe për një brezni tjetër, mundësia e mbajtjes së premtimeve, që i bëmë
botës në rrugë zhvillimi”. Benedikti XVI – përgjigjet në letrën e 18 qershorit
kardinali Bertone – lutet që takimet ndërkombëtare të parashikuara për gjysmën e dytë
të vitit në vijim, t’i japin një përgjigje konkrete krizave ekonomike, të cilat trondisin
zona të ndryshme të planetit e të realizojnë një plan veprimtarie ndërkombëtare, për
ta çliruar botën nga varfëria e skajshme, nga plaga e urisë e nga mungesa kronike
e shërbimit mjekësor të përgjithshëm. Në mënyrë të posaçme, sekretari i Shtetit
të Vatikanit përsërit fjalët e mesazhit të Papës, drejtuar një muaj më parë Konferencës
së FAO-s mbi sigurinë ushqimore. “Nuk duhen globalizuar vetëm interesat ekonomike
e tregtare, por edhe solidariteti! Po si? Në radhë të parë, pasi ta falënderojnë FAO-n
për luftën që po bën kundër urisë, qeveritë duhet të bashkëpunojnë në mënyrë gjithnjë
më transparente me organizatat e me shoqëritë civile, që impenjohen për të sheshuar
hendekun ndërmjet pasurisë e varfërisë. E përveç kësaj, duhen vënë në jetë reformat
strukturore që, në nivel kombëtar, janë të domosdoshme për të përballuar me sukses
problemet e prapambetjes ekonomike, me pasojë të drejtpërdrejtë urinë e ushqimin e
keq”.Urohet, prandaj – vijon letra e kardinalit Bertone – që t’i kushtohet vëmendja
e duhur respektimit të dinjitetit njerëzor në gjitha bisedimet, në të gjitha vendimet
e në gjithë rrugën që ndiqet për vënien e tyre në jetë, në mënyrë që frytet e gjithësisë
të shfrytëzohen nga të gjithë e sidomos, nga breznitë e ardhshme. Vetëm në se punohet
me një ndjenjë të lartë përgjegjësie e bujarie – përfundon letra - mund të garantohet
vënia në jetë e Objektivave të Mijëvjeçarit brenda datës së caktuar.