Patriku i ri i Jeruzalemit, imzot Tual, pas dorëzimit të Palios: "E jetoj misionin,
i sigurtë për ndihmën e Papës e të mbarë Kishës".
(03.07.2008 RV)Të dielën e kaluar ishte në Bazilikën e Vatikanit, në mes të
një grupi të madh sivëllezërish, për të marrë nga Benedikti XVI Palion e shenjtë,
që u jepet ipeshkvijve metropolitë të sapoemëruar. Por për imzot Fuad Tualin, Patrik
i ri latin i Jeruzalemit, shenja e shkallës hjerarkike që mori nga Papa, është edhe
shenjë e përgjegjësisë së madhe baritore, në një zonë ku equilibri shpirtëror e gjeopolitik
është tepër i brishtë. Këtë e pohon edhe vetë Prelati në mikrofonin e Radio
Vatikanit:
Përgjigje: - Pata në fillim një farë shqetësimi për emërimin
tim si ipeshkëv-ndihmës i Jeruzalemit, duke njohur mirë situatën dramatike që jetohet
atje e që nuk të lë të shpresosh shumë për të ardhmen. Por kohët e fundit, takimi
me miqtë, të cilët i pata gjithnjë pranë në këto ditë feste, shpirtrat e bukur me
të cilët u takova, lutjet, që iu bënë Zotit për mua, më siguruan se nuk jam vetëm
në këtë situatë. Po shkoj, prandaj, për ta marrë mbi vete këtë përgjegjësi me gëzim,
me shpresë. Gjatë ditëve që kalova në Romë, u takova me të gjithë eprorët e mi, duke
përfshirë edhe Atin e Shenjtë, e kudo gjeta mbështetje, mikpritje, edhe nga besimtarët
e nga miqtë. Kjo të jep guxim e, sidomos, sigurinë se ne nuk jemi vetëm. Mund të ecim
përpara me vetëdijen qind për qind, të kufizimeve tona, por qind për qind edhe të
forcës sonë, që vjen nga Hyji, nga lutjet e shumë e shumë njerëzve, të cilët janë
pranë nesh në çaste të vështira.
Pyetje: - Misioni juaj ka përmasa
kryesisht baritore, shpirtërore, por ndoshta ndoshta, edhe politike…
Përgjigje:
- Po, ne kujdesemi për njeriun dhe është normale që politika të ndikojë mbi
jetën e njeriut. Nga ana tjetër, kemi një pikë të fuqishme të përbashkët me politikanët:
njeriun! Autoritetet civile, nga njëra anë, bëjnë gjithçka munden për t’i shërbyer
njeriut, dinjitetit të tij, punës së tij, shëndetit e kështu me radhë, e ne, nga ana
tjetër, kujdesemi si për jetën materiale, ashtu edhe për përmasën njerëzore, për lirinë
e njeriut, për mbrojtjen e dinjitetit të tij, për jetën e tij shpirtërore. Ne, prijësit
fetarë, së bashku me autoritetet civile, duhet të bëjmë shumë, të bashkëpunojmë e
të koordinojmë përpjekjet për mirëqenien e njeriut, pavarësisht nga feja e tij, që
mund të jetë ajo e krishterë, myslimane ose hebreje, sepse të gjithë jemi bij të një
Hyji të vetëm e Jezusi vdiq e u ngjall për të na siguruar të gjithëve gëzimin e shëlbimit!
Të
dielën e kaluar ishte në Bazilikën e Vatikanit, në mes të një grupi të madh sivëllezërish,
për të marrë nga Benedikti XVI Palion e shenjtë, por tani imzot Tual është kthyer
në Jeruzalem, pikërisht atje ku atentati i fundit vuri përsëri në rrezik armëpushimin
në Rripin e Gazës dhe jetën e shumë njerëzve. Hamasi – sipas njoftimit të njërit nga
udhëheqësit – i ka ndërprerë takimet për shkëmbimin e të burgosurve me Izraelin, i
cili që prej dy vjetësh kërkon lirimin e rreshterit Gilad Shalit. Ndërkaq bëhen
përpjekje për të zbuluar shkaktarët e atentatit, që tronditi qendrën e Jeruzalemit
ku dje, një burrë në timon të një buldozeri, u përplas pas një autobuzi të linjës,
pasi vrau 5 vetë e plagosi 30 të tjerë.