Vrasje barbare e një rregulltari salezian në Nepal. Dyshohet një grup terrorist. Dëshmia
e ipeshkvit, Entoni Sharma.
(01.07.2008 RV)Për meshtarët që kryejnë misionin në Azi, është një viktimë
e re; për Nepalin, viktima e parë. Mbrëmë u vra barbarisht meshtari salezian 62 vjeçar,
Atë Xhon Prakash, drejtor i një shkolle në Sirsia, në zonën perëndimore të Morangut.
Autorë të vrasjes, sipas hetimeve të para, duhet të jenë disa fanatikë, që veprojnë
prej kohe në zonën e trazuar të Nepalit. Rrethanat e vrasjes nuk janë ende të qarta:
meshtari është mbytyr nga shpërthimi i një bombe të flakur prej një grupi të armatosur,
që ka lënë edhe trakte në vendin e vrasjes. Shpërthimi i fuqishëm dëmtoi rëndë edhe
shtëpinë ku banonte meshtari, ndërtuar një vit më parë. Atë Xhon Prakash, me origjinë
nga Shteti indian i Keralasë, punonte në Nepal prej dhjetë vjetësh. Në çastin e sulmit,
ishte së bashku me një salezian tjetër, që shpëtoi për mrekulli nga vdekja. Me sa
duket, shkaku i vrasjes ka të bëjë me përpjekjen për të marrë para nga drejtori i
shkollës, të cilit i është kërkuar dy herë një shumë e madhe të hollash. Ipeshkvi
i Nepalit, imzot Entoni Sharma, flet në mikrofonin e Radios sonë për meshtarin,
që punonte prej dhjetë vjetësh në gjirin e vendasve Santals, të krishterë e jo,
me një program shoqëror, të organizuar e të mbështetur nga Bashkimi Evropian:
Përgjigje:
- A wonderful man… Njeri i mrekullueshëm, me zemër të madhe, shumë bujar. Nuk
mendonte kurrë për veten, por gjithnjë për të tjerët. Është kërcënuar disa herë, sepse
Nepali banohet nga shumica indu, e këta fanatikë dëshirojnë që të krishterët e myslimanët
të largohen nga vendi. Ne menduam se problemi ishte zgjidhur, sepse patëm biseduar
me ta. Por, me sa duket, ata nuk u bindën dhe kryen këtë vrasje të shëmtuar.
Pyetje:
- Mund të na e shpjegoni psenë e një sulmi të tillë kundër një meshtari katolik?
Është çështje fetare, apo politike? Përgjigje: Well, now has been declared… Tani
në Nepal sapo u deklarua Shteti laik. Kushtetuta e re, që do të hartohet, do të jetë
laike. Mbreti Gianendra, monark indu, nuk është më në fuqi, e kjo i ngacmon posaçërisht
fanatikët indu, sepse deri tani Nepali ishte e vetmja mbretëri indu në botë: nuk i
kanë më privilegjet që kishin më parë. I njëjti grup hodhi një bombë edhe gjatë një
prej takimeve të lutjes, organizuar nga besimtarët myslimanë, jo shumë larg vendit
ku u vra meshtari katolik. Në këtë rast mbetën të vrarë dy besimtarë myslimanë.