365 ditë me njerëz e ngjarje që ia ndryshuan faqen botës: "Gjovana di Shantal, që
jetoi me moton: Të bësh gjithçka me dashuri, asgjë me dhunë!”.
(27.07.2008 RV)Jemi në vitin 1604
e ipeshkvi i Anesisë, Françesku i Sales, shkon të kalojë ca kohë në Dizhon. Me që
të gjithë e admirojnë mënyrën bindëse me të cilën flet për Hyjin, një turmë vigane
i ndjek vazhdimisht predikimet e tij. Një ditë Françeskun shkon ta takojë kryeipeshkvi
i Bryges, mik i Shenjtit të ardhshëm, i shoqëruar nga një grua e re, veshur e tëra
me të zeza, siç e kanë zakon të vishen vejushat. Françeskut i duket fytyrë e njohur.
Ka mundësi të jetë një nga fytyrat që ka parë në mes të turmës, e cila mblidhet për
ta dëgjuar. “Françesk, kjo është mbesa ime, Gjovana di Shantal!”. Gjovana i
tregon historinë e saj. U martua kur ishte njëzet vjeçe me një burrë, të cilin e donte
me gjithë zemër. Jetuan së bashku për tetë vjet. Ishin tepër të lum deri në vitin
1601, kur shoku i dashur i jetës i vdiq në një aksident, në sa kishte shkuar për
gjah. Gjovana është vetëm 28 vjeçe, kur mbetet vejushë e nënë e katër fëmijëve, të
cilët duhet t’i rrisë e t’i edukojë e vetme. Nga eleganca e nga zgjuarësia që i burojnë
prej gjithë qenies, Françesku e merr me mend se duhet të jetë një nënë e jashtëzakonshme.
Po, ashtu është vërtetë, por Gjovanës kjo nuk i mjafton. Nga njëra anë dëshiron t’i
rrisë sa më mirë fëmijët, nga ana tjetër ndjen thirrjen të lërë gjithçka për Hyjin.
Si t’ia bëjë, që këto dy ëndrra të mos e errësojnë njëra-tjetrën? Ky takim shënon
fillimin e një miqësie të ngushtë ndërmjet Françeskut të Sales e Gjovanës Shantal.
Me kalimin e kohës bijtë e Gjovanës rriten e ajo mund të zgjedhë rrugën e jetës rregulltare:
më 1610, së bashku me Shën Françeskun, themelon në Anesì Urdhërin e Vizitacionit.
Urdhëri mirëpret gratë që dëshirojnë t’i kushtohen lutjes dhe shërbimit të të sëmurëve.
Në atë kohë një mision i tillë i dyfishtë çudit shumkënd, sepse njerëzia janë mësuar
t’i shikojnë të mbyllura ndër kuvende gratë, që i kushtohen lutjes. Gojët e liga nisin
t’i shpërrallojnë vizitandinet, që sillen nëpër qytete për të mjekuar të sëmurët.
Në vitin 1619 Françeskut e Gjovanës u duhet të dorëzohen e, për t’i mbyllur këto gojë,
të heqin dorë nga asistenca e të sëmurëve nëpër shtëpitë e tyre. Duhet pritur të ndryshojë
kjo mendësi!Por Gjovana nuk e humbet guximin. Përkundrazi. I bie Francës kryq e tërthor
e themelon kudo kuvende të reja të Vizitacionit. Pas vdekjes së Françeskut, më 1622,
e ndihmojnë shumë njerëz të tjerë, të cilët e admirojnë veprën e saj, e posaçërisht,
Vinçenci i Paolës, që i bëhet krah në punën për drejtimin e kuvendeve. Po fjala ‘drejtim’
ndoshta është e papërshtatshme për mënyrën si vepron Gjovana. Ajo nuk pranon kurrë
të thirret Eprore e përgjithshme. Mendon se tetëdhjetë e shtatë kuvendet e Vizitacionit,
duhet të drejtohen me frymën e miqësisë e jo të autoritetit. Ajo jeton me moton e
Shën Françeskut: “Të bësh gjithçka me dashuri e asgjë me dhunë!”.