Беларусь і рымска-каталіцкая Царква будуць рыхтаваць да падпісання Пагадненне аб супрацоўніцтве.
Прэзідэнт Аляксандр Лукашэнка запрасіў Папу Бенедыкта 16-га наведаць Беларусь.
Рымска-каталіцкая Царква ўсведамляе прызначэнне Беларусі як маста між Усходам і Захадам.
Такія асноўныя вынікі двухбаковых перамоваў дзяржсакратара Ватыкану з уладамі РБ
. Дзякуй Богу, пра гэта паведамляюць СМІ Беларусі вельмі падрабязна і вы, паважаныя
нашы слухачы, можыце ўсё пачытаць на свае вочы. Вечарам 20 чэрвеня 2008 г. Дзяржаўны
сакратар Ватыкану і пасланец Папы Бэнэдыкта XVI кардынал Тарчызіо Бэртонэ
ў суправаджэнні герархаў Касцёла Беларусі прыбыў у пінскую катэдру Унебаўзяцця
Найсвяцейшай Панны Марыі, дзе адбылося набажэнства ўрачыстых Нешпараў на лацінскай
мове.Падчас Нешпараў кардынал Бэртонэ прамовіў казанне, у якім, між іншым,
заклікаў святароў: «Народ Божы, які жыве тут, у Пінску, вам, дарагія святары, даручаны
Хрыстом, Добрым Пастырам, які чакае, што вы будзеце клапаціцца пра яго гэтак жа, як
і Ён сам, і з такою ж адданасцю. Таму будзьце палымянымі правадырамі, якія нясуць
радасць, уласцівую тым, хто са шчыраю душою служыць Пану Богу». Высокі госць наведаў
пінскую Міждыяцэзіяльную вышэйшую духоўную семінарыю імя святога Тамаша Аквінскага,
дзе сустрэўся з выкладчыкамі і навучэнцамі установы. Падчас сустрэчы паміж кардыналам
і семінарыстамі быў наладжаны жывы дыялог: навучэнцы маглі задаваць пытанні, на якія
госць з задавальненнем і гатоўнасцю адказваў. Дзяржаўны сакратар Ватыкану ўручыў канцлеру
Пінскай дыяцэзіі і пробашчу пінскай катэдры кс. Станіславу Паўліне ордэн «Bene
merenti»(«За заслугі»). Высокі госць таксама падарыў пінскай катэдры
рэліквар з гербам Пантыфіка і камплект арнатаў чатырох колераў, якія ўручыў Апостальскаму
Адміністратару Пінскай дыяцэзіі кардыналу Казіміру Свёнтку. 20 чэрвеня 2008
г., Мітрапаліт Мінска-Магілёўскі арцыбіскуп Тадэвуш Кандрусевіч паведаміў,
што падчас сустрэчы Дзяржаўнага сакратара Cвятога Пасаду кардынала Тарчызіо Бэртонэ
з Прэзідэнтам Рэспублікі Беларусь Аляксандрам Лукашэнкам было прынята рашэнне
распачаць працу па падпісанні Пагаднення аб супрацоўніцтве паміж Апостальскай
Сталіцай і Рэспублікай Беларусь. Акрамя таго, Прэзідэнт Рэспублікі Беларусь
перадаў Папу Рымскаму запрашэнне наведаць Беларусь. Падчас афіцыйнага снедання
ў гонар высокага госця з Апостальскай Сталіцы Міністр замежных спраў Рэспублікі
Беларусь спадар Сяргей Мартынаў падарыў кардыналу Бэртонэ майку футбольнай
зборнай РБ з нумарам «12» (які сімвалізуе месяц нараджэння кардынала — снежань) і
надпісам «Bertone», бо вядома, што Яго Экселенцыя нават быў спартыўным телекаментатарам
футбольных матчаў у Генуі, дзе перад заняццём высокага пасаду Дзяржсакратара шмат
год займаўся душпастырсвам і выкладаў ва ўніверсітэтах, ён вітае спорт і стаўся па
даручэнню Папы Бенедыкта 16 арганізатарам ватыканскай футбольнай каманды з семінарыстаў,студэнтаў
каталіцкіх ВНУ Рыма і швейцарскіх гвардзейцаў.