Viti kushtuar Shën Palit Apostull në Shqipëri e veçanërisht në Tiranë
Më 28 qershor fillon viti paolin, me Meshën Shenjte të kremtuar nga Papa Benedikti
XVI në Bazilikën e Shën Palit jashtë Mureve në Romë. Gjatë këtij viti, në të cilin
bie 2000 vjetori i lindjes së Apostullit të Popujve, në Romë e në mbarë botën janë
parashikuar aktivitete e lutje. Do të jetë e mundur që në disa kisha të caktuara paraprakisht,
të merret ndjesa e plotë. Viti paolin do të kremtohet edhe në Shqipëri, sidomos
në dioqezën e Tiranë-Durrësit, e cila katedralen e saj kryesore, atë të Tiranës ia
ka kushtuar pikërisht Shën Palit Apostull. Shqipëria ka një lidhje të veçantë me Apostullin
e Pupojve, pasi mendohet se është ungjillëzuar pikërisht prej tij. Vetë Shën Pali,
në letrën drejtuar Romakëve shkruan se e ka përhapur Ungjillin e Krishtit “nga Jeruzalemi
e përqark në Iliri” (Rom 15,19). Edhe në Shqipëri, viti paolin do të fillojë
më 28 qershor me një meshë të kremtuar në orën 11, në Kishën Katedrale kushtuar shenjtit
në Tiranë. Pikërisht katedralja e Tiranës është caktuar nga Vatikani si kisha ku besimtarët
shqiptarë mund të marrin ndjesën e plotë gjatë vitit paolin. Kushtet për këtë, sipas
dekretit të Penitenciarisë Apostolike, janë rrëfimi, kungimi dhe lutja sipas ndjetit
të Papës. Bensimtarët e penduar me të vërtetë për mëkatet e tyre duhet të shtegtojnë
për në katedralen e Shën Palit në Tiranë dhe të marrin pjesë në ndonjë ceremoni, apo
veprimtari kishtare në nder të shën Palit. Gjithashtu, ata duhet të luten para figures
së Apostullit të Popujve dhe në përfundim të thonë Atynën, Besojmën Apostolike dhe
të kërkojnë ndërhyrjen e shën Marisë Virgjër e të shën Palit pranë Zotit për zgjidhjen
e halleve e derteve të tyre. Nga ana tjetër, duhet të kujtojnë edhe shën Pjetrin Apostull,
festa e të cilit bie në të njëjtën ditë me atë të Shën Palit. Konferenca Ipeshkvnore
e Shqipërisë ka formuar një komision të posaçëm kombëtar për të organizuar disa veprimtari
gjatë vitit kushtuar shën Palit.