(17.06.2008 RV)Nesër, Sekretari i Shtetit të Vatikanit, kardinali Bertone do
të vizitojë ish-Republikën sovjetike të Bjellorusisë. Pra, nga data 18 deri më 22
qershor, Sekretari i Shtetit të Vatikanit do të qëndrojë pesë ditë në Bjellorusi.
Sipas programit të kësaj vizite zyrtare, më datën 18 qershor, Sekretari i Shtetit
të Vatikanit do të mbërrijë në kryeqytetin e Biellorusisë, Minsk, ku do të pritet
nga autoritet kishtare e civile. Në mbrëmjen e 18 qershorit, do të vizitojë selinë
e Karitasit dioqezan. Të enjten në mëngjes, do të mbahet takimi i shumëpritur i
kardinalit Bertone me Metropolitin ortodoks të Minskit e Slukit, Filaret, Hekzark
patriarkal i tërë Biellorusisë; më pas do të zhvillohet biseda me presidentin e Komitetit
për Çështjet fetare e për Pakicat etnike të Kryeministrisë, Guljako, dhe me ministrin
e Jashtëm, Martinov. Pasdite Lectio Magistralis e kardinalit Bertone drejtuar botës
së kulturës, profesorëve e studentëve të Universitetit Shtetëror bjellorus, mbi temën
"Feja e arsyeja: t'i flasësh për Zotin njeriut të sotëm". Në vijim, vizita pranë bashkësisë
greko-katolike dhe prania në Teatrin Kombëtar të Baletit, ku do të shfaqet "Krijimi
i Botës". Të premten në mëngjes, takimi i sekretarit të Shtetit të Vatikanit me
Konferencën ipeshkvnore bjelloruse, e më pas, biseda me presidentin e Republikës,
Llukashenko, për të marrë pjesë pastaj në drekën e ofruar për nder të kardinalit Bertone
nga ministri i Jashtëm. Pasdite prelati i lartë do të takohet në Katedralen e Minskit
me kardinalin Kazimirz Sviatek dhe do të marrë pjesë në lutjen e Mbrëmësores. Të
shtunën paradite, në Grodno, kremtimi i Meshës së Shenjtë në Katedrale e pastaj takimi
me meshtarë e rregulltarë; pasdite në Minsk, bekimi i gurit të parë të Kishës së Gjon
Pagëzuesit e takimi me të rinjtë. Të dielën në mëngjes, takimi me bashkësinë e
famullisë kishtare, në kishën e Shën Simonit e shën Elenës; e pastaj vënia e një kurore
me lule në sheshin e Fitores; më pas do të kremtohet Mesha e Shenjtë në kishën katedrale
të Minskut. Në orën 12.45 konferenca e shtypit, para drekës me ipeshkvijtë dhe me
vizitatorin apostolik për besimtarët greko-katolikë. Së fundi nisja në orën 18.00
nga aeroporti i kryeqytetit dhe kthimi në Romë.