Papa gjatë vizitës në Brindizi:‘Të jeni të dhembshur si Krishti me njerëzit e varfër
e të ligshtë’.
(15.06.2008 RV)“Banorët e qytetit
të Brindizit të jenë simbol e mjet i dhembshurisë e i mëshirës së Krishtit’. Kjo
është porosia kryesore e Benediktit XVI në qytetin puliez, ku sot paradite kryesoi
Meshën Shenjte. Papa e përfundoi shtegtimin e dhjetë baritor në Itali, duke u takuar
me klerin vendas, ndërsa në mesditë, si zakonisht, kremtoi lutjen e Engjëllit të Tënzot,
gjatë së cilës u bëri thirrje të gjitha kombeve t’i kundërvihen indiferencës e të
punojnë së bashku për paqen në botë. ‘Jo pietizëm, por solidaritet. Jo asistencializëm,
por ndarje e përbashkët e pasurive’. Kjo është mëshira e vërtetë e krishterë, që
i hap rrugën shpresës për të ardhmen, sepse i ka themelet në Hyjin. E pikërisht kjo
mëshirë e kjo dhembshuri, sipas porosisë së Papës, duhet ta dallojë Kishën dhe shoqërinë
brindiziane e pulieze, ashtu si gjithë Kishën katolike. Njëmijë vjet pas pranisë
së një pape në këto troje, fjalët e Benediktit XVI i shndërruan viset jugore të Italisë,
udhëkryqe trafikësh e djerse të derdhur pa fryt, në një hapësirë reflektimi shpirtëror.
Në Portin e Brindizit, që sot u kthye në një Shesh të Shën Pjetrit mbi det, u mblodhën
shtatëdhjetë mijë vetë, ndërmjet të cilëve, shumë të rinj. E Ati i Shenjtë duke ua
njohur mirë shqetësimet e problemet, i ftoi të jenë misionarë në trojet e tyre e
të ecin në gjurmët e Apostujve: burra që Jezusi i thirri – tha Papa – jo pse ishin
shenjtorë, por për t’u bërë të tillë. Me veshjen kishtare, qepur për këtë rast
me pëlhurë tipike brindiziane mesjetare, Benedikti XVI e kryesoi Meshën në elterin
e madh në portin e Brindizit, portë e hapur drejt Lindjes, gjë që u theksua më shumë
edhe nga prania e metropolitit ortodoks të Italisë, Genadios, të cilin Papa e përshëndeti,
duke i kujtuar thirrjen ekumenike të Kishës së Brindizit. E pikërisht këtë Kishë Ati
i Shenjtë e porositi të jetë e mëshirshme me të gjithë, duke nënvizuar edhe tiparin
themelor të mëshirës së krishterë: “Mëshira e krishterë nuk ka asgjë të përbashkët
me pietizmin, apo hipokrizinë fetare, e as me asistencializmin. Ajo, sinonime me solidaritetin
dhe me ndarjen e përbashkët të të mirave, gjallërohet nga shpresa. Thua nuk lind nga
shpresa fjala që Jezusi u thotë Apostujve të vet: ‘Gjatë rrugës, predikoni se mbretëria
e Hyjit është afër?’. E kjo shpresë bazohet tek ardhja e Krishtit, që në fund të
fundit përkon me Vetjen e tij e me misterin e tij të shëlbimit, siç kujtohet në titullin
e takimit të katërt kishtar italian, kremtuar në Veronë: ‘Krishti i ngjallur është
shpresa e botës".