Islami dhe dialogu: editorial i drejtorit tonë të përgjithshëm, atë Federiko Lombardi.
(14.06.2008 RV)Kur Mbreti i Arabisë
Saudite erdhi për të vizituar Papën në Vatikan, i pati folur për një projekt dialogu
ndërmjet feve të mëdha monoteiste. Përvijimet e iniciativës dukeshin akoma mjaft të
përgjithshme. Por Sovrani vazhdoi rrugën e tij, e pasi u fol edhe herë të tjera për
këtë temë, gjatë ditëve të kaluara në Mekë u zhvillua një Konferencë Islamike Botërore,
si fazë përgatitore për fillimin e një dialogu të madh, së pari brenda për brenda
Islamit e më pas me krishterimin dhe hebraizmin, me qëllim mbrojtjen e promovimin
e dinjitetit të njeriut, të familjes së kërcënuar në identitetin e saj, të paqes ndërmjet
popujve. Mbreti vuri në dukje shprehimisht se disa ndjekës të Islamit, viktima të
ekstremizmit, e shtrembërojnë nga brenda natyrën e vetë Islamit si fe e paqes. Në
Konferencë morën pjesë 500 personalitete dhe intelektualë myslimanë të rrymave të
ndryshme të mendimit në të gjithë botën, të cilët, në “thirrjen” përfundimtare, përsëritën
“jo”-në e tyre për ndeshjen ndërmjet qytetërimeve, duke ftuar përgjegjësit e popujve
të merren vesh e të nxisin kulturën e dialogut. Ka akoma rrugë të gjatë për të
bërë për t’u njohur e për t’u kuptuar mbi të drejtat e njeriut; ndryshimet teologjike
do të mbeten të pareduktueshme; gjendja konkrete e shumë pakicave të krishtera në
tokë myslimane është dramatike. Gjithsesi, sa më tepër të përsëritet pohimi e të rrënjoset
bindja se në emër të Zotit nuk mund të urrehemi, por të takohemi e të dialogojmë,
aq më mirë është. Papa Gjon Pali II e pati treguar këtë rrugë në Asizi. Rruga nuk
është e thjeshtë për myslimanët, nuk është e thjeshtë për hebrenjtë, nuk është e thjeshtë
për të krishterët. Duhet ta vazhdojmë me durim e guxim.