Sinodi i Ipeshkvijve dhe Bibla: reflektim i dekanit të Fakultetit të Teologjisë në
Universitetin Papnor Salezian në Romë
(13.06.2008 RV)Dje, në Sallën e Shtypit të Selisë së Shenjtë u paraqit Instrumentum
Laboris për Asamblenë XII të Përgjithshme të Zakonshme të Sinodit të Ipeshkvijve,
që do të mbahet në Vatikan nga 5 deri më 26 tetor. Tema e këtij sinodi është: “Fjala
e Zotit në jetën dhe në misionin e Kishës”. Në fjalën e tij, kryeipeshkvi Nikola Eteroviç,
sekretari i përgjithshëm i Sinodit të Ipeshkvijve, nënvizoi se reflektimi sinodal
duhet të favorizojë njohjen dhe dashurinë për Fjalën e Zotit. Bibla – kujtoi ai –
është libri më i përhapur në botë, por lexohet pak e jo gjithnjë kuptohet. Të dëgjojmë
biblistin, don Xhorxho Xevini, dekan i Fakultetit të Teologjisë në Universitetin Papnor
Salezian në Romë: Besoj se synimi i madh i këtij Sinodi duhet të jetë sigurisht
në nivelin baritor, por edhe në atë misionar, përpjekja për t’i dhënë orientimet krejt
Kishës, për rinovimin e ungjillëzimin e saj. Për më tepër do të thosha, se sot ka
një kërkesë të madhe nga çdo bashkësi e Kishës për baritorinë biblike, pra për një
baritori të frymëzuar vazhdimisht nga Shkrimi i Shenjtë e nga Bibla. Objektivat që
ky Sinod duhet të verë në dukje janë pikërisht këto e pra, njohja e kuptimit të drejtë
të baritorisë biblike në jetën e misionin e Kishës, arritja në një vizion të përbashkët
mbi kuptimin e shprehjes “Fjala e Zotit”, duke sqaruar kështu termat, pra, ç’do të
thotë “Fjala e Zotit”, “Bibla”, “Shkrimi i Shenjtë”. E duhet marrë parasysh edhe ndikimi
i gjuhës aktuale të komunikimit mbi Biblën: një temë kjo, me shumë rëndësi e interes.
Gjithashtu, duhen evidentuar edhe iniciativat e mëdha të takimit me Biblën në nivelin
e popullit të Zotit, gjatë këtyre 40 vjetëve, që nga Koncili II i Vatikanit e duhet
shkuar përpara. E së fundi, të tërheqim vëmendjen mbi Kushtetutën dogmatike “Dei Verbum”
të Koncilit II të Vatikanit, që është një hartë e vërtetë referimi mbi Fjalën e Zotit
për jetën e Kishës dhe të çdo besimtari.