Inkurajimi i Papës Benedikti XVI për ipeshkvijtë e Bangladeshit, barinj të një bashkësie
të vogël katolike, me probleme varfërie e diskriminimi
(12.06.2008 RV)Papa Benedikti XVI u takua sot paradite me ipeshkvijtë e Bangladeshit
në vizitë ad Limina dhe e inkurajoi bashkësinë e krishterë të këtij vendi me shumicë
myslimane ta shpallë Ungjillin me guxim, pavarësisht nga vështirësitë e diskriminimet. Ati
i Shenjtë e falenderoi këtë bashkësi për zhvillimin e saj në një situatë plot sfida
shoqërore, për rritjen e numrit të thirrjeve dhe për ndihmën që ajo jep në vende të
tjera, në veçanti për seminaristët dhe meshtarët e Koresë. Kujtoi situatën e varfërisë,
të izolimit e të diskriminimit në të cilën jeton pakica e krishterë, pa harruar të
nënvizojë impenjimin në dialogun ndërfetar: “Si të krishterët e parë – u tha
Benedikti XVI ipeshkvijve të Bangladeshit – ju jetoni si bashkësi e vogël në mes të
një popullate shumica e së cilës jo e krishterë”. Është një dëshmi që duhet vazhduar,
ashtu siç thotë Ungjilli, duke dhuruar plotësisht vetveten, sepse vetëm kjo sjell
gëzim. Për këtë, theksoi Papa, është e nevojshme dëshmia personale e jetës sipas parimeve
të krishtera. Ati i Shenjtë foli për rolin e laikëve, në veçanti në mësimin e
katekizmit në përgatitje të Sakramenteve, sidomos të martesës, e cila sipas Papës,
duhet kuptuar si “impenjim besnik për gjithë jetën e si rrugë drejt shenjtërisë”.
Më pas, Benedikti XVI u bën thirrje ipeshkvijve të jenë tolerantë, të moderuar e të
kujtojnë se Kisha katolike përqafon popuj të të gjitha racave e gjuhëve, se nuk kufizohet
në një kulturë të vetme apo në një sistem të vetëm politik, shoqëror e ekonomik dhe
është në shërbim të krejt familjes njerëzore. Nën qeverisjen e ushtarakëve deri
në vitin 1990, me zgjedhjet e vitit 1991, Bangladeshi kaloi në legjislacionin kushtetues,
por me tensione që shpesh e kanë çuar vendin në prag të luftës civile. Përsa i përket
fesë, është një vend me 90% të popullsisë myslimane. Të krishterët janë 1% e popullsisë
e prej tyre, vetëm 0,2% janë katolikë. Pjesa tjetër janë hinduistë.