FAO: Biokarburantet dhe ndihmat për bujqësinë, problemet kyç për të ardhmen
(03.06.2008 RV)Një plan i përgjithshëm veprimi për të garantuar ushqimin e
mjaftueshëm për të gjithë, për të përballuar ndryshimet e klimës dhe për të vendosur
norma mbi prodhimin e biokarburanteve. Këto janë problemet e shtruara për zgjidhje
në konferencën e nivelit të lartë të FAO-s, që filloi sot në Romë. Marrin pjesë rreth
5 mijë përfaqësues nga 183 vende të botës. Në hapjen e punimeve të mbledhjes së
FAO-s, presidenti i Italisë, Xhorxho Napolitano foli për “krizë dramatike”, zgjidhja
e së cilës nuk i duhet besuar vetërregullimit të tregut. Sekretari i përgjithshëm
i Kombeve të Bashkuara, Ban Ki-Mun propozoi një plan strategjik botëror me masa me
afat të shkurtër e të gjatë, me qëllim frenimin e rritjes së çmimeve të ushqimeve.
Në bazë të këtij plani, do të ndihmohet bujqësia në mënyrë që brenda vitit 2030, prodhimi
ushqimor të rritet me 50%. Kjo recetë u mbështet edhe nga drejtori i FAO-s, Zhak Diëf,
sipas të cilit nevojiten 30 miliardë dollarë në vit. Propozimet e liderëve të
pranishëm, jo të gjithë dakord me asistencën e propozuar, shkuan nga nënshkrimi i
një “karte për sigurinë ushqimore” e deri tek ndihmat ndaj vendeve më të varfëra e
heqja e masave mbrojtëse për bujqësinë e vendeve të pasura, sidomos të Bashkimit Evropian
e SHBA-ve. Të tjerë vunë theksin mbi problemin e shpërndarjes së produkteve ushqimore,
e cila krijon më tepër pabarazi se vetë prodhimi i ushqimeve. Presidenti iranian,
Ahmadinexhad, duke kritikuar ashpër Kombet e Bashkuara e “vullnetet djallëzore”, që
veprojnë brenda tyre, kërkoi krijimin e një institucioni botëror për të administruar
me efikasitet tregun ushqimor të globit, nga prodhimi deri tek konsumi. “Të heqim
dorë nga prodhimi i armëve – shtoi ai që akuzohet për programin bërthamor të vendit
të vet – askush nuk mund të jetojë pa ushqim”.