У нядзелю 1 чэрвеня 2008 г. мужчыны Гродзенскай дыяцэзіі здзейсняць пешую пілігрымку
ў Капцёўку да касцёла імя Найсвяцейшай Панны Марыі. Такім чынам будзе адзначаны Дзень
бацькі, які традыцыйна святкуецца ў Гродзенскай дыяцэзіі ў першую нядзелю чэрвеня.
Раніцай мужчыны прымуць удзел у святой Імшы ў францішканскім касцёле ў Гродне,
пасля чаго вырушаць у дарогу. Па прыбыцці на так званы пагорак надзеі, дзе іх з гарачым
абедам сустрэне пробашч парафіі кс. канонік Лешэк Дамагала, вернікі разам памоляцца
перад абразом Найсвяцейшай Панны Марыі (копіяй абраза Маці Божай у Чэнстахове), прымуць
удзел у духоўнай канферэнцыі, а таксама ў набажэнстве Крыжовага шляху. У 15.00 адбудзецца
ўрачыстая святая Імша, цэлебраваць якую будзе біскуп Гродзенскі Аляксандр Кашкевіч. У
гэты дзень ва ўсіх парафіях Гродзенскай дыяцэзіі падчас святых Імшаў святары і вернікі
моляцца за бацькоў, сыноў, братоў, бо ад жыццёвай падставы кожнага мужчыны, ад якасці
і глыбіні яго веры, ад прынцыпаў жыцця шмат у чым залежыць будучыня нашага грамадства.
Дарэчы, у першую нядзелю мая, у дыяцэзіяльны Дзень маці, у пілігрымку да Капцёўкі
ішлі і жанчыны — сёлета іх было каля 600. Паводле Catholic.by