Papa priti në audiencë nëntë ambasadorë të rinj pranë Selisë së Shenjtë: gjashtë nga
Afrika, dy nga Azia e një nga Evropa lindore.
(29.05.2008 RV)Sot paradite, duke pritur
në audiencë nëntë ambasadorë të rinj pranë Selisë së Shenjtë, Benedikti XVI kujtoi
se qeveritarët e mbarë botës duhet të përpiqen t’i garantojnë paqen e dinjitetin e
jetës jo vetëm popujve të tyre, por mbarë njerëzimit. Gjatë takimit me Atin e Shenjtë
paraqitën letrat kredenciale gjashtë afrikanë: përfaqësuesi i Tanzanisë (Ahmada Rueiemamu
Ngemera), i Ugandës (Nyine Bitahva), i Liberisë (Veslei Momo Xhonson), i Çadit (Hisein
Brahim Taha), i Nigerisë (Obed Vadzani), dhe i Gueinesë (Aleksandër Çeçe Lua). Pastaj,
dy aziatikë: nga Bangladeshi (Debaprija Batakaria) e nga Sri Lanka (Tikiri Bandara
Maduvegedera) dhe një evropian nga Bjellorusia (Sergei Aleinik). Gjatë takimit
me diplomatët e rinj pranë Selisë Apostolike, Papa uroi që Hyji t’i ndihmojë në përpjekjet
për ndërtimin e një shoqërie sa më paqësore, duke pasur mirë parasysh rolin e shteteve
e të qeverive për progresin e përgjithshëm: “Në botën e sotme – theksoi
Papa - udhëheqësit e kombeve luajnë një rol të rëndësishëm jo vetëm në vendet e
tyre, por edhe në marrëdhëniet ndërkombëtare, me qëllim që të gjithë njerëzit të sigurojnë
kushte sa më mira jetese atje ku kanë vendosur të qëndrojnë. Prandaj – vijoi Ati
i Shenjtë – masa e parë që duhet marrë në lëmin e politikës, është kërkimi i drejtësisë,
sepse vetëm kështu mund të arrihet në respektimin e dinjitetit dhe të drejtave të
çdo njeriu si dhe në ndarjen e ndershme të pasurisë kombëtare. E kjo vlen edhe
në planin ndërkombëtar. Vendet e pasura – kujtoi Shenjtëria e Tij – nuk mund t’i përvetësojnë
e t’i përdorin në dobinë e tyre pasuritë që vijnë nga troje të tjera. Është detyrë
drejtësie e solidariteti – nënvizoi me forcë Benedikti XVI– që bashkësia ndërkombëtare
të jetë vigjilente, kur është fjala për shfrytëzimin e burimeve, e t’i kushtojë vëmendje
të veçantë krijimit të kushteve të përshtatshme për zhvillimin e vendeve, që kanë
më shumë nevojë. Përveç drejtësisë - vijoi të kujtonte Papa – është e nevojshme të
krijohet edhe fryma e vëllazërimit, për të ndërtuar, kështu, shoqëri plot harmoni,
ku mbretërojnë pajtimi e paqja e ku problemet e mundshme, zgjidhen me rrugën e dialogut
e të mirëkuptimit, duke shmangur rrezikun e ushtrimit të dhunës, në të gjitha format
e saj, sepse dhuna godet gjithnjë njerëzit më të ligshtë e më të varfër. Së fundi
Ati i Shenjtë u bëri thirrje kishave vendase të kontribuojnë me të gjitha forcat për
sigurimin e mirëqenies së bashkatdhetarëve, duke i shërbyer njeriut, të gjithë njerëzve,
pa kurrfarë dallimi.