Kryeministri Berisha: në Shqipëri centralet bërthamore italiane
(29.05.2008 RV)Kryeministri i Shqipërisë, Sali Berisha është gati t’ia hapë
dyert kujtdo që dëshiron të ndërtojë një central bërthamor në Shqipëri. Idenë ia ka
paraqitur edhe kryetarit të Asamblesë së përgjithshme të OKB-së, Srgjan Kerim, i cili
ndodhej për vizitë në Tiranë. Para gatishmërisë së Berishës për të bashkëpunuar për
centralin bërthamor me vendet fqinje, ose me sektorin privat, Kerim theksoi se ndërtime
të tilla duhen bërë duke respektuar mbrojtjen e mjedisit nga ndotja. Në një intervistë
të botuar në gazetën e sotme italiane “Corriere della Sera”, kryeministri Berisha
tregohet i gatshëm t’u hapë dyert italianëve për ndërtimin e centralit bërthamor dhe
sqaron se po përgatitet kuadri ligjor në bashkëpunim me Agjensinë ndërkombëtare Atomike
të Vienës. “Energji bërthamore? Po, faleminderit!” citon gazeta Berishën në shqip,
duke vënë në dukje se kryeministri po e jep vendin e vet me një ofertë speciale e
pa shumë shqetësime. E ndërsa fizikanët italianë deklarojnë se ndërtimi i një centrali
bërthamor në Itali kërkon vite vetëm për të formuar personelin përkatës, i cili pas
referendumit antibërthamor është shpërndarë e specializuar në degë të tjera, Shqipëria
është gati t’u japë në dorë italianëve ndërtimin e centralit të saj bërthamor. Gazetari
e ngacmon kryeministrin shqiptar edhe për tema të tjera, si tragjedia e Gërdecit dhe
përfshirja e familjes së tij në çështje, por Berisha driblon fillimisht e pastaj deklaron
se kur ka marrë vesh që armët i shiteshin Afganistanit me çmim të dyfishuar i ka telefonuar
presidentit Karzai duke i ofruar municione falas. E shkon edhe më tej! Municione falas,
Berisha paska dhënë edhe gjatë luftrave të fundit në Ballkan, “kombeve mike”, siç
shpjegon ai, pa dhënë emra. E akoma! I pyetur për librin e Karla del Pontes, ku Shqipëria
akuzohet se ka lejuar një kamp përqëndrimi të UÇK-së, ku bëhej edhe trafik organesh,
Berisha përgjigjet se Del Pontes i duket vetja si Agata Kristi, shkrimtare e njohur
e romaneve policeske, dhe e akuzon atë për shpifje. Pyetjes së gazetarit për të ardhmen
e tij në politikë, Berisha i përgjigjet se vetëm dy gjëra mund ta çojnë në pension:
Zoti i gjithëpushtetshëm dhe populli shqiptar. E me këto fjalë përfundon edhe artikulli
i gazetarit Françesko Batistini në “Corriere della Sera”.