Dialogu ekumenik, në qëndër të vizitës së sekretarit të Shtetit të Vatikanit, kardinalit
Bertone, në Ukrainë.
(29.05.2008 RV)Ukraina është udhëkryq ndërmjet kulturave të Lindjes e të Perëndimit
e mund të luajë një rol tepër të rëndësishëm në Bashkimin Evropian, të cilit po i
troket në portë. Këtë bindje ka kardinali Bertone, sekretar i Shtetit të Vatikanit
i cili, në përfundim të një udhëtimi katërditor (23-26 maj) në Leopoli e Kiev, ku
u takua edhe me presidentin Jushenko dhe zevendës-kryeministrin, Nemyria, nënvizon
se Ukraina është një laborator i vërtetë ekumenik, që lidh Evropën perëndimore me
atë lindore. Psenë e kësaj konsiderate për Ukrainën, kardinali Bertone e shpjegon
kështu, në mikrofonin e Radio Vatikanit:
Përgjigje: -
Sepse, në të vërtetë, Ukraina mund të luajë një rol të rëndësishëm, duke qenë pikë
takimi, udhëkryq ndërmjet kulturave të Lindjes e të Perëndimit. Kisha - në se kujtojmë
fjalët e famshme të Gjon Palit II – e jo vetëm Kisha, por edhe Evropa, duhet të marrë
frymë me dyja mushkëritë: Lindje-Perëndim. Pikërisht sivjet kremtohet 1020 vjetori
i ungjillëzimit të parë të vendit që, duke u nisur nga Ukraina, u shtri drejt Lindjes
dhe vuri bazat e atyre rrënjëve të krishtera, që janë humusi i kësaj toke e që mund
të sigurojnë unitetin ndërmjet popujve të Lindjes e të Perëndimit.