Ndihma e Kishës për popullsinë e Mianmarit, viktimë e ciklonit Nargis
(28.05.2008 RV)Në Mianmar, pavarësisht
se junta ushtarake ka pranuar ndihmat ndërkombëtare, pakot me ushqime, ilaçe e veshmbathje
nuk mbërrijnë popullsinë e goditur nga cikloni Nargis. Janë ndihmuar më pak se gjysma
e 2 milion e 500 mijë të shpërngulurve. Zona të tëra, si Delta e lumit Irrauadi, janë
të paarritshme. Llogaritet që cikloni të ketë shkaktuar 130 mijë viktima. Të dëgjojmë
si impenjohet Kisha katolike, përmes fjalëve të ipeshkvit të Pateinit, imzot Xhon
Hsane Hgjyi: Bashkësia ndërkombëtare ka dërguar shumë ndihma. Por ne, si Kishë,
nuk kemi pritur ndërkombëtarët. Seminaristë, rregulltarë e katekistë kanë organizuar
grupe dhe kanë shkuar në zonat e goditura për të shpëtuar njerëzit e për t’u çuar
atyre ushqime. Për shembull, në dioqezën time, ashtu si në dioqezat e tjera, sapo
kaloi cikloni, dërguam barka me ushqime, ilaçe e veshmbathje dhe celularë për t’u
dhënë mundësi komunikimi të shpërngulurve. Kemi organizuar edhe kampe ku po ndihmojmë
njerëzit dhe po ato ndihma u dërgojmë edhe atyre që kanë mbetur nëpër fshatra. Cilat
janë nevojat më të mëdha? Ndihmat e emergjencës në këtë moment, janë ushqimet,
çadrat, asistenca shëndetësore dhe veshmbathjet. Pastaj, do të jetë e nevojshme ndihma
për rindërtimin. Para se të vija në Romë, në vizitë ad Limina, i thashë komitetit
të dioqezës së duhet të gjejmë pajisje për bujqësinë dhe fara për të filluar mbjelljen.
Sezoni i shirave përfundoi e pas disa muajsh nuk mund të mbjellim më asgjë. Ky është
momenti, por në vend nuk ka fara.