Kongregata për Institutet e jetës rregulltare boton një Udhëzim mbi shërbimin e autoriteteve
dhe bindjen.
(28.05.2008 RV)“Shërbimi i autoriteteve dhe bindja” – titullohet Udhëzimi i
Kongregatës për Institutet e jetës rregulltare dhe Shoqëritë e jetës apostolike, botuar
sot nga dikasteri i Vatikanit. Udhëzimi u paraqit para asamblesë së eprorëve dhe eproreve
të përgjithshme, pranë Universitetit Salesianum, në Romë. Dokumenti, me pesëdhjetë
faqe, nënvizon se rrënja e bindjes duhet gjetur në kërkimin e Hyjit e të vullnetit
të tij, të cilit i nënshtrohet çdo besimtar. Prandaj të gjithë janë të thirrur t’i
binden autoriteteve, duke pasur mirë parasysh se bindja e krishterë nuk është thjeshtë
zbatim i ligjeve e i udhëzimeve kishtare e rregulltare, por një çast tepër i rëndësishëm
i kërkimit të Hyjit, që mund të gjindet, duke dëgjuar Fjalën e tij, duke fituar vetëdijen
e planit të dashurisë së tij e të përvojës së Krishtit, që u bind, për dashuri, deri
në vdekjen mbi kryq. “Autoriteti në jetën rregulltare” duhet kuptuar si shërbim
ndaj bashkësisë, që vullneti i Zotit të kërkohet e të realizohet bashkërisht. Teksti
përballon edhe temën delikate të ‘bindjes së vështirë’, dmth të rasteve kur ajo që
i kërkohet rregulltarit a rregulltares, është e vështirë të realizohet, ose rasteve
kur ai që duhet të bindet, mendon se mund të bëjë gjëra më të mira e më të dobishme
për shpirtin e tij, sesa ato që urdhëron eprori. Në këto raste kujtohet “Krishti,
që e mësoi bindjen, duke pësuar mundimet”. Por bindja nuk duhet të jetë pasive,
as zbatim pa përgjegjësi i urdhërave. Ajo duhet kuptuar gjithnjë si pranim i vetëdijshëm
i impenjimeve, duke i parë si zbatim konkret të vullnetit të Zotit. Ndërsa roli
i autoriteteve paraqitet si ‘ndërmjetësi njerëzore’ e vullnetit të Zotit. Por – sqarohet
- kjo nuk do të thotë se vullneti i Zotit përkon përsosurisht e automatikisht me vullnetin
e Hyjit: është vetëm një mjet që, si çdo gjë njerëzore, ka kufizimet e gabimet e veta.
Megjithatë kujtohet se, kur rregulltari merr një urdhër të ligjshëm, Zoti i kërkon
t’i bindet autoritetit që e përfaqëson në atë çast. Autoriteteve u kërkohet të
ecin gjithnjë në rrugën e dialogut e të bashkimit, pavarësisht nga larmitë, dhe t’i
trajtojnë gjithnjë mirësisht njerëzit që u janë besuar, duke krijuar atmosferën e
bindjes vëllazërore, larg çdo përdhune.