(18.05.2008 RV)Sot Kisha katolike
kremtoi Solemnitetin e Trinisë Shenjte. U përkujtua edhe Shën Gjoni I papë e martir.
Burim
i paqes është ligji i Zotit. Gjithçka është e mundur për atë që beson e di të lutet,
edhe atëherë kur i duhet të përballojë pasojat e tundimit të të keqit. Këtë meditim,
që na e nxit të hënën liturgjia e festës së Shenjtorëve Pjetër Çelestini V
papë; Urbani I papë, Parteni e Kallugjeri, martirë; Ivo meshtar, Krispini nga Viterbo,
rregulltar kapuçin, duhet ta ketë mirë parasysh çdo nxënës i Krishtit.
Të
martën është festa e Shën Bernardinit nga Siena, meshtar françeskan dhe e Shën
Aureas, martire e Osties. Me jetën e tyre na sigurojnë se kush shpreson në Zotin,
nuk mbetet kurrë i zhgënjyer.
Shën Kristofori Magalanes e shokët e tij, martirë
në Meksikës dhe Shën Eugjeni de Mazenod, ipeshkëv i Marsejës, themelues i Oblatëve
të Zojës së Papërlyer, që do të kremtohen të mërkurën, na kujtojnë se lumninë
e Zotit mund ta shohin edhe ata që nuk bëjnë pjesë në rrethin e nxënësve të afërt
të Krishtit. Ai i Lumi u bën thirrje të gjithë njerëzve të marrin pjesë në ndërtimin
e Mbretërisë së Hyjit.
Të enjten në Vatikan do të kremtohet Solemniteti
i Korpit dhe i Gjakut të Krishtit, e kremte e madhe, të cilën Kishat e tjera, e edhe
Kisha në trojet shqiptare, për arsye baritore, do ta kremtojnë të dielën e ardhshme.
Është edhe festa e Shën Ritës nga Kashia.
“Lum të mëshirshmit, sepse do të
gjejnë mëshirë!” Këtë na kujtojnë, të premten, Shën Gjon Pagëzues de Rosi,
meshtar romak dhe Shën Ubaldi, ipeshkëv i Gubios në liturgjinë e festës së tyre.
E shtuna është dita e festës së Zojës ndihmëtare. Kjo e kremte nis
të përkujtohet që në kohën e Papës Piu V, në shenjë mirënjohjeje për fitoren e madhe
të flotës të koalicionit të botës së krishterë kundër flotës turke më 7 tetor 1571.
Në sa flota turke shpartallohej, duke u mënjanuar kështu rreziku i tmerrshëm i shtrirjes
së pushtimit otoman mbi vise të tjera të krishtera, Papa pa në vegim se fitorja ishte
siguruar me ndërmjetësinë e Zojës së Bekuar. Prandaj urdhëroi që ndër litani të shtohej
edhe thirrja : “Mari, ndihma e të krishterëve, lutu për ne!”. Prej këndej, edhe titulli
“Zoja ndihmëtare”. Një fitore tjetër e madhe, ajo e Vjenës, në vitin 1683, bëri
që devocioni i Zojës nën këtë titull, të përhapej në Austri, në Gjermani e në Itali.
Piu VII e caktoi festën e Zojës Ndihmëtare më 24 maj.
Të dielën e ardhshme
Kisha universale do të kremtojë solemnitetin e Korpit e të Gjakut të Krishtit.