Saktësim i kardinalit Bertone mbi ndalimin e shugurimeve meshtarake të njerëzve me
prirje homoseksuale.
(17.05.2008 RV)“Kisha, ndonëse duke i respektuar thellësisht njerëzit në fjalë,
nuk mund t’i pranojë në Seminar e në urdhërat kishtare, ata që praktikojnë homoseksualitetin,
që kanë prirje thellësisht të rrënjosura homoseksuale ose që përkrahin të ashtuquajturën
kulturë gay”. Kjo normë, që përmbahet në Udhëzimin e Kongregatës për Edukimin Katolik
të 4 nëntorit 2005 (Udhëzim mbi kriteret e shqyrtimit të thirrjes, lidhur me personat
me prirje homosksuale, parë në lidhje me pranimin e tyre në Seminar e në urdhërat
kishtare) vlen për të gjitha Shtëpitë që merren me formimin e meshtarëve të ardhshëm,
duke përfshirë edhe ato që varen nga Dikasteret për Kishat Lindore, për Ungjillëzimin
e Popujve dhe për Institutet e Jetës së Përkushtuar e Shoqëritë e Jetës Apostolike”.
Kjo saktësohet në një “Rescriptum ex audientia” me nënshkrimin e kardinalit Tarçizio
Bertone, Sekretar i Shtetit të Vatikanit, miratuar nga Papa e publikuar pas kërkesave
të shumta për sqarime lidhur me këtë problem, drejtuar Selisë së Shenjtë. Kujtojmë
se Udhëzimi i vitit 2005 pohonte se për shkak të shembëllimit të meshtarit me Krishtin,
‘ai duhet t’ia dhurojë gjithë vetveten Kishës, duke u dalluar për një dashuri të vërtetë
baritore’: për këtë arsye, kandidati për meshtari, duhet të arrijë pjekurinë e plotë
ndjenjësore. Një pjekuri e tillë e bën të aftë për krijimin e marrëdhënieve korrekte
me burrat e gratë, duke krijuar në shpirtin e tij një atësi të vërtetë shpirtërore
për bashkësinë kishtare që i është besuar. Për ata që kanë prirje homoseksuale
të rrënjosura thellë, Udhëzimi, duke kërkuar ‘të shmanget çdo diskriminim i padrejtë’,
thekson se njerëz të tillë ndodhen në një gjendje që e pengon seriozisht lidhjen
korrekte me burrat e gratë, prandaj nuk duhen shpërfillur pasojat negative që mund
të rrjedhin nga shugurimi i tyre. Ndërsa, kur bëhet fjalë për prirje homoseksuale
kalimtare – shton Udhëzimi – si për shembull, në periudhën e adoleshencës, ende larg
pjekurisë, prirje të tilla duhen zhdukur të paktën tri vjet para shugurimit”.