Benedikti XVI ipeshkvijve tailandezë, në vizitë ‘ad Limina”: të promovojnë dialogun
ndërfetar, për të përballuar sfidat e globalizimit.
(16.05.2008 RV)Dialogu ndërfetar, sidomos me budistët, dhe mbrojtja e dinjitetit
të njeriut, posaçërisht përballë fenomeneve të turpshme, si trafiku i fëmijëve dhe
prostitucioni, ishin temat kryesore të fjalimit që mbajti sot Benedikti XVI, duke
pritur në audiencë ipeshkvijtë e Tailandës, me rastin e vizitës së tyre ‘ad Limina
Apostolorum’. Papa vuri theksin edhe mbi kontributin e institucioneve shkollore katolike
në gjirin e shoqërisë tailandeze. Solemniteti i Rrëshajëve, që e kremtuam të dielën
e kaluar - nënvizoi Ati i Shenjtë - i kujton secilit nga ne se Shpirti Shenjt na
nxit t’ua kumtojmë Krishtin të gjithë njerëzve. Në Tailandë – vijoi Papa – ky mision
i bashkësisë së vogël katolike kryhet në rrethanat e marrëdhënieve me budistët, të
cilët prelatët tailandezë i vlerësojnë për kontributin e tyre në jetën shoqërore e
kulturore të vendit: “The coexisestence of different religious communities…” Bashkëjetesa
me bashkësitë e ndryshme fetare – pohoi Papa – zhvillohet në sfondin e globalizimit,
që e ndan njerëzimin në dy pole. Nga njëra anë, vërehet thellimi i lidhjeve kulturore
dhe ekonomike, që zakonisht e forcojnë ndjenjën e solidaritetit global dhe atë të
përgjegjësisë së përbashkët për të mirën e njerëzimit. Ndërsa, nga ana tjetër, vërehen
shenjat shqetësuese të copëzimit e të individualizmit, që kanë si pasojë zhvillimin
e mëtejshëm të shekullarizmit, i cili dëshiron ta mbyllë Zotin në sferën private,
duke errësuar kështu të vetmin burim të harmonisë e të unitetit të universit. Prej
këndej, Papa bëri thirrje për bashkëpunim ndërfetar, sidomos me budistët, për t’u
transmetuar breznive të reja traditat fetare e njerëzore. “Of particular
concern to you is the scorge of the trafficking…” Benedikti XVI denoncoi
me forcë shuplakën e trafikut të grave e të fëmijëve si dhe atë të prostitucionit,
plagë e hapur në gjirin e shoqërisë tailandeze. Duke theksuar se një fenomen i tillë
buron nga varfëria, Benedikti XVI i porositi ipeshkvijtë ta luftojnë me të gjitha
forcat çdo formë të shfrytëzimit njerëzor, t’i kundërvihen banalizimit të seksualitetit
në media e në industrinë e dëfrimit, që shkatërron çdo vlerë morale dhe çon në zvetënimin
e gruas, në ligështimin e besnikërisë bashkëshortore e deri në shpërdorimin e fëmijëve. Takimi
i sotëm i ipeshkvijve tailandezë me Papën shënoi edhe përfundimin e vizitës së tyre
‘ad Limina’, duke i hapur kështu rrugën ipeshkvijve shqiptarë, të cilët do të jenë
të hënën e ardhshme në Vatikan, për të filluar vizitën e tyre të dytë ‘tek Varret
e Apostujve”.