(14.05.2008 RV)India në darën e
atentateve. Një zinxhir shpërthimesh përfshiu dje qytetin e Zhaipurit, kryeqytet i
Raxhastanit, duke shkaktuar së paku 80 viktima e mëse 150 të plagosur. Policia ka
vendosur shtetrrethimin, ndërsa hetimet për autorët e krimeve çojnë në ambiente ekstremistësh
islamikë, të lidhur me Al Kaidën. Janë arrestuar dhe marrë në pyetje katër persona.
Po përse të goditet Shteti i Raxhastanit, i cili ndodhet në kufi si me Pakistanin,
ashtu edhe me Kashmirin? Pyetëm atë Karlo Torrianin, misionar i Institutit Papnor
të Misioneve të Jashtme, i cili që prej 39 vjetësh punon në lebrozarët indianë: Mendoj
se kanë dashur të godasin industrinë turistike të Indisë: Zhaipur, Qyteti i Kuq, është
një qendër turistike. Është goditur pra një industri, që i sjell të ardhura Indisë. Flitet
për ekstremistë islamikë të lidhur me Al Kaidën, të cilët janë kundër pranisë indiane
në Kashmir. Cila është situata gjeopolitike e Indisë veriperëndimore? Kontrolli
i Kashmirit i ka keqësuar marrëdhëniet ndërmjet Indisë dhe Pakistanit, që nga lindja
e këtyre dy shteteve. Kufiri është vetëm një vijë kontrolli e nuk njihet nga asnjëri
prej shteteve e as në nivelin ndërkombëtar. Edhe akte të tjera ekstremizmi janë të
lidhura me Al Kaidën. Por, kohët e fundit, atentatet i atribuohen jo aq Pakistanit,
sa Bangladeshit. Por thuhet edhe se është Pakistani, që vepron përmes myslimanëve
të Bangladeshit. Si vepron Kisha katolike në këto zona? Kisha katolike
është pakicë, por është përpjekur gjithnjë të ndërmjetësojë mes mazhorancës hindu
dhe pakicës më të madhe, asaj myslimane.