(08.05.2008 RV)Ish-presidenti Putin u konfirmua sot nga Duma ruse si kryeministër
i vendit, pasi dje i dorëzoi postin delfinit të tij, Dimitri Medvedev. Gjatë fjalimit
që mbajti para parlamentit, Putin theksoi se dëshiron të merret kryesisht me ekonominë,
për të cilën nevojiten masa të rënda në nivelin makroekonomik. Hapi i parë që parashtroi
ishte rritja e përpjekjeve për uljen e inflacionit. Për këtë vit, inflacioni në Rusi
parashikohet të jetë 14,3%. Gjithashtu, Putin konfirmoi strategjinë ekspansioniste
të Moskës. Ai denoncoi se thjesht “arësye politike” kanë penguar që kompanitë ruse
të investojnë jashtë vendit. Gjatë vitit të kaluar, këto investime mund të ishin 50
miliard dollarë më shumë.
Kohë të vështira për lobistët evropianë në
Bruksel. Me 547 vota pro, 24 kundër e 593 abstenime, Parlamenti Evropian miratoi
një rezolutë që kërkon rregulla më të rrepta për rreth 15 mijë lobistët, që sillen
rreth institucioneve të Bashkimit Evropian në Strasburg e Bruksel. Ndër to, spikat
regjistrimi i detyrueshëm në një regjistër të veçantë dhe transparenca më e madhe
për aktivitetin e lobistëve në terren. Këto masa konsiderohen të pamjaftueshme për
të parandaluar abuzimet, pasi nuk parashikojnë sanksione dhe i lihen shpesh vullnetit
të secilit. Vitin që vjen, Komisioni Evropian ka mundësi të marrë masa më të rrepta
edhe në këtë fushë.
Të gjenden programet më të shkëlqyera në fushën e parandalimit
të krimit dhe të arritjes së optimumit të sigurisë për qytetarët. Ky është objektivi
që i ka vënë vetes Instituti Ndërrajonal i OKB-së për kërkimet mbi krimin e drejtësinë,
që sot ka përuruar një laborator për këtë qëllim, në Torino të Italisë. 30 ekspertë
nga 15 shtete konfrontohen mbi mënyrat më të mira për t’i bërë ballë problemeve të
sigurisë. Ideja është të krijohet një metodë globale nga praktikat e mira të disa
vendeve në fusha të ndryshme. Për shembull, analizohet teknika me të cilën Skocia
ka zgjidhur problemin e huliganëve, ose Hong Kongu ka zgjidhur problemin e korrupsionit
në polici. OKB-ja dëshiron edhe të shtrijë në të gjithë zonën e Mesdheut, përvojën
italiane me Konsultën për pluralizmin fetar e kulturor, e vetmja e këtij lloji në
Bashkimin Evropian.