Papa ipeshkvijve të Kubës: me guxim e bujari, Kisha t’i japë popullit kuban shpresën
e Krishtit.
(02.05.2008 RV)Sot, duke pritur
në audiencë ipeshkvijtë e Kubës me rastin e vizitës së tyre ‘ad Limina, Papa u drejtoi
një fjalim plot me shpresën e së ardhmes. Benedikti XVI i inkurajoi prelatët t’i
kushtohen posaçërisht edukimit të të rinjve, formimit të laikatit, mbrojtjes së vlerave
të familjes e të martesës. Kërkoi edhe që zëri i katolikëve të ndjehet më shumë në
mjetet e komunikimit dhe të sigurohet një numër i mjaftueshëm vendesh kulti për kërkesat
baritore të Kishës katolike. Në këtë çast të historisë, Kisha e Kubës është e
thirrur “ t’i japë shoqërisë kubane të vetmen shpresë të vërtetë: Krishtin, Zotin
tonë” – tha Benedikti XVI, duke theksuar se pikërisht falë kësaj shprese, besimtarët
kubanë vijuan të ecin pa u lëkundur në rrugën e fesë e të dashurisë. Prandaj – porositi
Papa - jeta shpirtërore duhet të zërë vendin e parë në të gjitha planet baritore. Si
kujtoi afërsinë shpirtërore me Kishën e Kubës dhe lidhjet e ngushta të ipeshkvijve
kubanë me Selinë Apostolike, Ati i Shenjtë ceku edhe shtegtimin e fundit të kardinalit
Tarçizio Bertone, sekretar i Shtetit të Vatikanit në Ishullin karaibik, duke vënë
theksin mbi gjallërinë e Kishës në Kubë: “La vida eclesial cubana ha experimentado
un cambio profondo…” Jeta kishtare kubane – tha Papa – bëri një ndryshim të
thellë posaçërisht me vizitën historike të Gjon Palit II, dhjetë vjet më parë. Me
gjithë vështirësitë e kufizimet, u thellua puna baritore, gjë që ndikoi fuqimisht
në përforcimin e frymës misionare në të gjitha bashkësitë kishtare kubane. E këto
fjalë të Benediktit XVI, u pasuan nga ftesa për të bërë që drita e Krishtit të ndrisë
në të gjitha fushat e shoqërisë: “Uno de los objetivos prioritarios del Plan
de Pastoral…” Papa kujtoi se një nga përparësitë e programit të punës baritore,
hartuar nga ipeshkvijtë, është vlerësimi i laikatit të vetëdijshën për detyrën dhe
misionin në Kishë e në botë. Më pas i porositi ipeshkvijtë që, me ndihmën e katekistëve
të mirëpërgatitur, të punojnë për edukimin fetar në të gjitha nivelet. E kjo, sepse
laikët mund ta çojnë dritën e Krishtit edhe në skajet më të fshehta të jetës shoqërore
të vendit. Papa kujtoi edhe shtimin e thirrjeve për rrugën meshtarake, si burim
kryesor i shpresës për Kishën; porositi të thellohet puna për përgatitjen e seminaristëve
e, sidomos, puna baritore me e për familjen. “Sé cuánto les preocupa la
situación de la familia...” Benedikti XVI vuri në dukje shqetësimet kryesore
të ipeshkvijve kubanë lidhur me familjen, e cila kërcënohet nga divorci e pasojat
e tij, nga ndarjet familjare për shkak të emigracionit e nga shkaqe të tjera. Pastaj,
porosia për t’i edukuar të rinjtë me vlerat e familjes. “He podido comprobar
con gozo la generosidad...” Shikoj me gëzim – tha në përfundim Ati i Shenjtë,
duke vlerësuar lart punën e rregulltarëve e të rregulltareve – bujarinë me të cilën
Kisha i kushtohet shërbimit të të varfërve e të të braktisurve, duke merituar kështu
mirënjohjen e mbarë popullit kuban. E uroj – shtoi akoma Papa – që lumnimi i afërt
i Shërbëtorit të Hyjit, Atë Hosè Olalo Valdés, t’u japë ipeshkvijve një nxitje të
re për të qenë gjithnjë tharm i pajtimit, i drejtësisë e paqes.