(02.05.2008 RV)Partia Laburiste
humb rëndë në zgjedhjet administrative për rinovimin e 159 këshillave vendore në Britaninë
e Madhe. Një mbrëmje “e shëmtuar dhe tepër zhgënjyese”: kështu e përkufizoi mbrëmjen
e djeshme kryeministri Gordon Braun, duke komentuar rezultatin më të keq që prej 40
vjetësh. Nëse të dhënat do të projektoheshin në shkallë kombëtare, Partia Laburiste
do të ishte e treta me 24% të votave, ajo Liberaldemokratike do të fitonte 25%, ndërsa
të parët Konservatorët do të kishin 44%. Që prej kohësh, sondazhet në Angli u jepnin
të drejtë nostalgjikëve të Thaçerit, gruas së hekurt, që ka pa dyshim një vend të
padiskutueshëm në krijimin e shtetit social, i cili mënjanoi pushtetin e sindikatave.
Por konservatorët e sotëm nuk janë më ata të kohës së Thaçerit. Cilat ishin pra gabimet
e Laburistëve? Përgjigjet Antonio Varsori, profesor i historisë së Marrëdhënieve Ndërkombëtare
në Firence dhe ekspert i Britanisë së Madhe: Ka disa arësye që lidhen me situatën
ekonomike. Por, ka edhe arësye të tjera, që janë, si të thuash, me karakter personal:
Gordon Braun, që është kryeministër që kur u largua Bler, duket se nuk është në gjendje
të fitojë atë konsensus të opinionit publik që Bler ka pasur për një kohë të gjatë.
Nuk duhet lënë mënjanë edhe një aspekt tjetër. Opinioni publik është lodhur dhe dëshiron
ndryshime.