Агульная аўдыенцыя Папы ў сераду 30-га красавіка

Адбылася яна на Плошчы Сьвятога Пятра. Прыбыло на яе многа вернікаў і паломнікаў з цэлага сьвету.
. Была гэта 14-я сустрэча Бэнэдыкта 16-га з вернікамі ў гэтым годзе. У сваёй сёньняшняй катахэзе Сьвяцейшы Айцец зрабіў падрахунак свайго нядаўняга Апостальскага Падарожжа ў ЗША.
Гэтае падарожжа спалучалася з 2-х сотгоддзем паднясеньня да рангу мітраполіі дыяцэзыі Бальтімор. Другою мэтаю візыту быў удзел у паседжаньні ААН.
У часе сустрэчы з Прэзыдэнтам ЗША Сьвяцейшы Айцец падкрэсьліў значэньне спалучаньня рэлігійных прынцыпаў з этычнымі ды палітычнымі прынцыпамі з адначасным зьберажэньнем іхняе аўтаноміі.
Сустрэча з біскупамі- сказаў далей Папа ў часе сёньняшняе аўдыенцыі- была нагодаю для падзякі Богу за дагэтуляшняе разьвіцьцё Каталіцкага Касьцёла ў ЗША ды роздуму над яго будучыняю. Натуральным працягам гэтае сустрэчы была Сьвятая Імша ў Вашынгтоне ў часе якой ўсе маліліся пра новае выліцьцё Духа Сьвятога, каб узмацаваў веру ўсіх.
Бэнэдыкт 16 далей прыпомніў таксама іншыя важныя здарэньні з гэтага падарожжа як: сустрэчу з рэктарамі Каталіцкіх Унівэрсытэтаў ды школаў; сустрэчу з прадстаўнікамі іншых рэлігій; Экумэнічнае Набажэнства; Сьвятую Імшу ў Катэдры Сьвятога Патрыка з удзелам сьвятароў ды пасьвячаных асоб ды малітву на “Ground Zero”
Адведаньне сядзібы ААН з нагоды 60-ці годзя ўстанаўленьня Паўсюднае Дэклярацыі Правоў Чалавека было нагодаю, каб прыпомніць аб шматлікіх праблемах, няроўнасьцях і пагрозах якія існуюць ў сучасным сьвеце.
Канчаючы катахэзу Сьвяцейшы Айцец запрасіў усіх да абьяднаньня з ім у падзячнай малітве за гэтае паломніцтва, якое праходзіла пад лозунгам: “ Хрыстос нашаю надзеяю"
На заканчэньне аўдыенцыі Сьвяцейшы Айцец прывітаў усіх вернікаў, асабліва хворых, моладзь ды новыя шлюбныя пары, надзяляючы на ўсіх сваё Апостальскае Блаславенства.