(30.04.2008 RV)Një studim i paraqitur në Ministrinë e Brendshme italiane vë
në dukje se brenda një viti, italianët kanë më pak besim tek emigrantët dhe një e
treta e tyre është kundër ndërtimit të xhamive. Dje, studimi i Observatorit shoqëror
mbi emigracionin, realizuar nga firma Makno& Consulting, vë në dukje se numri i italianëve
që shohin emigrantët me mosbesim është rritur nga 5,9% e popullsisë në 11,3%, pra
dyfishuar, megjithëse rreth 42% e italianëve tregohen të gatshëm t’i mirëpresin. Më
problematikë konsiderohen emigrantët myslimanë. 28% e italianëve mendojnë se ata kanë
kontradikta me fenë katolike, 25% vërejnë se myslimanët janë shumë kritikë ndaj kulturës
dhe traditave italiane e 17% e italianëve kanë frikë se ata janë baza për celula integraliste,
nga ku mund të vijnë akte terroriste. Raporti ka edhe aspekte pozitive. Shumica
e italianëve, rreth 57%, mendojnë se emigrantët janë të nevojshëm për ekonominë e
madje kjo shifër rritet në 68,4%, kur është fjala për asistencën e të moshuarve. Mëse
gjysma e kampionit prej 1000 vetësh të marrë në shqyrtim mendojnë se emigrantët janë
të ndershëm, por klandestinët shihen si problem për sigurinë e vendit. Gjithnjë e
më shumë italianë janë dakord që t’u jepet nënshtetësia emigrantëve pas 5 vjetësh
qëndrimi në Itali e jo pas dhjetë, siç është ligji aktual, me kusht që të kapërcejnë
provën e njohjes së gjuhës italiane. Ashtu si për italianët, është marrë në shqyrtim
edhe një numër i njëjtë kampioni për emigrantët. Rreth 70% e tyre shprehen të kënaqur
nga puna. Për të pakënaqurit arësyet janë dy: mungesa e vazhdimësisë së punës dhe
mungesa e kontratës për punë shpesh të rënda. Emigrantët janë pak a shumë të kënaqur
edhe për shtëpinë ku banojnë, pavarësisht se nuk mungojnë problemet e lidhura me qiranë
e lartë dhe me numrin e madh të personave, që shpesh banojnë në të njëjtin vend. Studimi
vë në dukje një të dhënë të përbashkët me një raport të një Instituti të Britanisë
së Madhe: rritet numri i të huajve, që kthehen në vendet e tyre të origjinës, pas
kanë fituar aq sa kanë dashur në Itali. Problemi i islamikëve shfaqet çuditërisht
edhe ndërmjet vetë emigrantëve. 44,5% e emigrantëve jo-islamikë mendon se myslimanët
sjellin me vete vetëm probleme. Në krahasim me italianët, madje, emigrantët jo islamikë
janë më sensibël ndaj kushteve të gruas në botën islamike e shumë më tepër janë kundër
ndërtimit të xhamive në Itali. Ndërkaq, për 35% të myslimanëve, vështirësitë kryesore
që hasin në Itali janë mungesa e respektit për fenë e tyre, rreziku i humbjes së kulturës
personale, mungesa e ushqimeve të tyre dhe fakti që Italia paska tepër liri.