Serbia nënshkruan Marrëveshjen e Asociim-Stabilizimit me BE-në
(29.04.2008 RV)Pas bisedimeve intensive e aspak të lehta për ministrat e jashtëm
të Bashkimit Evropian, Serbia nënshkroi sot Marrëveshjen e Asociim-Stabilizimit, hapi
i parë drejt integrimit evropian. Boris Tadiç, presidenti i një vendi ku parlamenti
është i shpërndarë në pritje të zgjedhjeve të 11 majit, ishte ai që sot pasdite vendosi
firmën e Beogradit mbi marrëveshje. 27 vendet e Bashkimit Evropian gjetën një
zgjidhje me kompromis, pasi Hollanda e Belgjika pranuan që Serbia ta nënshkruajë marrëveshjen
me kusht që procesi i ratifikimit të marrëveshjes nga shtetet anëtare të pezullohet
deri në dorëzimin e kriminelëve të luftës, Ratko Mladiq dhe Radovan Karaxhiq në Gjykatën
e Hagës. Do të pezullohet edhe marrëveshja tregtare që shoqëron atë të Asociim-Stabilizmit.
Me këtë akt, Brukseli dëshiron t’u japë dorë të fortë europeistëve në zgjedhjet e
11 majit, por problemi nuk është aq i thjeshtë. Që sot, kryeministri Vojisllav
Koshtunica, edhe ai në dorëheqje e sipër, deklaroi se nuk i takon Tadiçit të nënshkruajë
marrëveshjen, me parlament të shpërndarë, pasi nuk ka konfirmimin e popullsisë, e
cila akoma duhet të votojë. Së dyti, firma e Tadiçit është një lloj pranimi i heshtur
i pavarësisë së Kosovës, njohur nga shumë vende të Bashkimit Evropian. Do ta konsideroj
si “të paqenë për Serbinë, kundër ligjit dhe kundër Kushtetutës çdo nënshkrim të marrëveshjes
në këtë fazë” – u shpreh Koshtunica. Ndërkaq, vlerësimi i parë për nivelin e bashkëpunimit
ndërmjet autoriteteve të Beogradit dhe Gjykatës së Hagës do të bëhet rreth 15 majit
dhe do t’i paraqitet Këshillit të ministrave të jashtëm evropianë nga kryeprokurori
i ri i Gjykatës, Serzh Bramerc.