Papa 29 diakonëve që shuguroi sot: “Misioni juaj është t’ ia çoni Ungjillin të gjithëve”.
(27.04.2008 RV) Sot, si
zakonisht, Benedikti XVI tha lutjen e Mbretëreshës Qiellore, i ndjekur nga mijëra
besimtarë të mbledhur në Sheshin e Shën Pjetrit, duke vënë në plan të parë kremtimin
solemn, kryesuar pak më parë në Bazilikën e Vatikanit. Është fjala për Meshën,
gjatë së cilës Ati i Shenjtë shuguroi 29 diakonë të dioqezës së Romës. Kremtimi
i sotëm dëshmoi edhe një herë se Papa i kushton gjithnjë vëmendje të dorës së parë
kuptimit të thirrjes meshtarake dhe shërbimit meshtarak. Gjatë tre vjetëve të papnisë,
Ati i Shenjtë ka uruar disa herë që meshtarët e rinj ta kumtojnë kudo e kurdoherë
plot gëzim Ungjillin. Në çdo shtegtim apostolik, në Itali e jashtë saj, Papa është
takuar gjithnjë me seminaristët, të rinjtë e thirrur për t’i shërbyer Krishtit dhe
njeriut në rrugën e meshtarisë. Më 13 maj 2005, pak ditë pas zgjedhjes së tij
në katedrën e Shën Pjetrit, Benedikti XVI u takua me klerin romak në Bazilikën Lateranense.
Papa i nxiti meshtarët e dioqezës së vet t’ia çojnë me guxim botës, dritën e Krishtit: “Në
se ne e kemi gjetur Zotin, në se për mua Zoti është dritë e gëzim i jetës, në se është
kështu, jemi të sigurtë se një tjetri që nuk e ka gjetur Jezusin, i mungon një gjë
themelore. Është, pranda, detyra jonë t’ua kumtojmë të gjithëve Zotin”. Papa
i fton seminaristët dhe meshtarët të kenë lidhje të thellë, personale, me Krishtin,
duke mos u kufizuar thjeshtë në marrjen e njohurive intelektuale. Më 29 prillin e
kaluar, Ati i Shenjtë, duke shuguruar 22 meshtarë të dioqezës së Romës në bazilikën
e Shën Pjetrit, i porositi të gjithë besimtarët t’i shoqërojnë me lutje:“Të lutemi
që në çdo famulli e bashkësi të krishterë t’i kushtohet vëmendje e dorës së parë thirrjeve
meshtarake dhe formimit të meshtarëve: kjo vëmendje nis në familje, vijon në seminar
e ka të bëjë me të gjithë ata që e kanë për zemër shpëtimin e shpirtërave”.