365 ditë me njerëz e ngjarje që ia ndryshuan faqen botës.
(25.04.2008 RV)25 prill: Luigji IX ose shenjtëria, ulur mbi fronin francez Jemi
në kështjellën e Vënsa, në vitin 1253. Që kur mbreti Luigji IX është kthyer, i mundur,
nga kryqëzata, oborrtarët janë tejet të shqetësuar … “Sa ka ndryshuar mbreti ynë!”. “Jeton
si murg, agjëron shpesh e rrëfehet javë për javë … Nuk arrij ta kuptoj pse e bën gjithë
këtë pendesë? E pse duhet ta mundojë kështu veten?”- thotë njëri. “Duhet ta mundojë
edhe shumë, madje, e duhet të bëjë edhe më shumë pendesë” – ia pret një kalorës. “Ç’do
të thuash, Jehan?” “ Nuk e di ç’ mendon për të, por unë nisem nga vetvetja. Nuk
ka asnjë dyshim se mbreti ynë është shumë i zoti. Asnjë sundimtar nuk e vë Hyjin në
qendër të jetës, siç bën ai. .. E bleu me peshë floriri kurorën e ferrave të Jezusit
e ne e pamë me sytë tanë kur e solli, këmbëzbathur, së bashku me t’ ëmën, Bardhën
e Kastiljes, deri në katedralen e Sans… E pastaj, një tjetër shenjë e devocionit të
tij është kapela e shenjtë, që e ndërtoi në ishullin e Sité, pranë ishullit të Shën
Luigjit, pikërisht për ta ruajtur aty kurorën. Duhet pranuar se është njeri me fe
të gjallë”. “Po atëherë ç’ka për t’u qortuar? Ma shpjego e mos vijo më ta mbulosh
me lëvdata”. “Është për t’u qortuar sepse vendosi të nisej për kryqëzatë, pa i
pyetur fare këshilltarët e tij. Sepse pyet vetëm kokën e vet… U nis me njëzet e
pesë mijë vetë, tetë mijë kalorës…. E, pak pasi zbriti në Egjipt, i vunë prangat dhe
e rrasën në burg. .. E mbretëreshës Bardha iu desh të paguante një thes me para për
ta liruar, atë e ushtarët e tij”. “E gjithë ato të mira që bëri për popullin e
vet, ku t’i çojmë?” – e ndërpret Rohani. “Kujdesin për të varfërit në gjithë mbretërinë.
Reformat për të përmirësuar drejtësinë e për të kufizuar pushtetin e të pasurve…?”. “Ndoshta
këto janë gjërat më të mira që bëri, gjëra që Hyji i pret prej çdo mbreti”- pranon
Jehani. “Domethënë, ti e kundështon kryqëzatën e re që po përgatit?” – ndërhyn
një tjetër. “Po, e kundërshtoj, e nuk besoj se jam i vetmi” – deklaron Jehani, Në
të vërtetë shumkush nuk dëshironte që Luigji IX të merrte pjesë në këtë kryqëzatë
të dytë, por mbreti nuk ua vuri veshin. Më 2 korrik 1270 u nis nga Eg-Mortë për në
Tunizi. Për herë të dytë ushtria e tij u përgjysmua nga sëmundjet. E edhe ai vetë
vdiq më 25 gusht, pasi vuajti tmerrësisht. Mund të jesh mbret; madje edhe shenjt e,
megjithatë … të gabosh. Luigji IX u kanonizua në vitin 1297, për jetën e tij shembullore
plot guxim, për vullnetin e mirë, drejtësinë e besimin në Zotin.